Blers gols ed anc daple casteis

L’equipa da Son Murezza è neida a Lai/Valbella cugl intent da gudagner igl derbi e sa revantscher uscheia per la tarada a tgesa ainten la pre-runda. Cun la revantscha ègl dantant sto navot, igls Engiadines èn ansomma betg sa cattos tigl gi e chegl durant 60 minutas. Gio siva 27 minutas è la parteida stada ple u manc decideida cugl resultat intermediar da 5 : 0 per Lai/Valbella. Igl derbi è sto signia da blers gols ed anc daple casteis. Crudos èn gist diesch gols ed igls dus arbiters on do 16 casteis.

Ferm powerplay digl team indigen

La squadra digl Grischun Central è stada siva dalla victorgia cunter igl magnatabella Dürnten ple tgi angal mutivada. Ella è er stada pertscherta tgi cun en success cunter Son Murezza davantess realitad la qualificaziun per la runda digls playoffs. Anc restan da giuier treis gis avant tgi la runda digls playoffs scumainza. Aint igl derbi cunter Son Murezza ò Lai/Valbella betg laschea en sulet stetg agl adversari. Persvadia ò igl team indigen cunzont an surdomber cun signier tots treis gols digl amprem terz graztga agl powerplay excellent. Marco chels on Dario Gredig, Luca Infanger e Yannick Bruderer.

Scu gio menziuno è igl inscunter dallas dus equipas digls lis turistics sto decidia gio siva 27 minutas. Strousch tgi igl sagond terz ò scumanzo è reuschia a Lai/Valbella antras Yasin Agha da far igl 4 : 0 e chegl quatter secundas siva tg’en giuieder da Son Murezza è turno digl banc da castei. Ainten la 27avla minuta ò Marc Cola fatg igl 5 : 0 ed er chel an ena situaziun da powerplay. Siva da chel ò Janis Pargätzi, igl goli da Son Murezza, banduno igl glatsch ed el è nia ramplazzo da Jan Lony. Curt sessour è alloura reuschia agls Engiadines da signier igl amprem gol. Ensatge pi tard ò Marc Cola gia danovamaintg success cun far igl sies sagond gol persunal tigl resultat intermediar da 6 : 1 siva 40 minutas.

Marc Christen ò persvadia

Ena raschung tgi Lai/Valbella ò betg casso daple gols è betg angal stada la prestaziun solida digls defensours, mabagn er la prestaziun extraordinaria da Marc Christen, igl goli da reserva. El ò do per Sergio Collet, tg’è betg sto a disposiziun per l’equipa digl Grischun Central pigl derbi. Las davosas 20 minutas ò la squadra indigena betg ple do schi persvadent e laschea ensatge daple libertad agl adversari. La consequenza è stada tgi Son Murezza ò marco anc dus gols e chegl siva 35 secundas digl davos terz e siva 14 minutas da chel terz. Ramon Pfranger è sto igl giuieder tg’ò marco igl 7avel gol per Lai/Valbella. Las davosas seis minutas digl derbi è igl gi sto signia da ples sadadas, uscheia tgi tottas dus squadras èn betg stadas cumplettas segl glatsch a parteir dalla 54avla minuta.