Collisiun frontala silla Via Alpsu – duas dunnas blessadas

Sco quei che la polizia cantunala dil Grischun scriva en ina communicaziun als mieds da massa, ei igl accident capitaus entuorn las 07.40 avon il portal dil nord dil tunnel dil Crap da Flem. Igl auto da persunas en direcziun Glion, manischaus d’ina dunna da 65 onns, ei collidaus frontalmein sil cuntervial cun in auto d’ina dunna da 28 onns. Entochen ch’il survetsch da salvament ei arrivaus han persunas privatas prestau igl emprem agid. Suenter in emprem tractament medicinal ein las duas persunas vegnidas transportadas dil Survetsch da salvament Surselva, respectivamein dil Survetsch da salvament Cuera el Spital cantunal Grischun a Cuera. In’ulteriura persuna ha cumbattiu cun in stezzafiug il fem che sorteva digl auto che carrava en direcziun Glion. Allura ei igl auto vegnius sferdentaus dils pumpiers da Flem. Stai engaschai el liug digl accident ein collaboraturs digl Uffeci da construcziun bassa dil Grischun sco era dalla polizia communala da Flem. Duront il salvament e las retschercas dalla polizia ha la Via Alpsu stuiu vegnir serrada per part cumpleinamein. La polizia cantunala dil Grischun sclarescha ils motivs digl accident. (cdm/fmr)