«Cun mia famiglia sunga adegna puspe an Surses»

Da curt è neida a pled tar ena contribuziun dall’emissiun dad SRF «Schweiz Aktuell» cun Carol Demarmels ena donna cun ena schlatta tg’ins canoscha da bleras famiglias an Surses. Cun contactar ella è alloura sa verifitgia tgi la politicra da 47 onns è propi uriunda da Surses ed ò er ena relaziun pi strètga cun Surses. Chegl cunzont cun far cun sia famiglia adegna puspe igl anviern u la stad vacanzas a Savognin, ma cunzont er cun esser sies bab da Tinizong. Tenor schlatta è Carol Demarmels uriundamaintg vaschigna da Salouf, oz da Surses. La donna è maridada e mamma da dus unfants e tratga se è ella aint igl cantun Argovia. Da professiun è Carol Demarmels docenta per matematica e plans da fatschentas. Scu tg’ella dei sezza seia ella an amprema lengia pero carstgang, chegl carstgang cun blera passiun ed angaschamaint. 

Sies genitours on mano la pensiun Piz d’Err a Tinizong

La politicra è feglia da Leo e Patricia Demarmels, oz Patricia Hieke. Els dus on mano anfignen aint igls onns 1980 la pensiun Piz d’Err a Tinizong. Pi tard ò igl pêr alloura vandia la pensiun a Tinizong, piglia dimora aint igl cantun Turitg e sessour aint igl cantun Argovia. Sa fatg en nom ainten la gastronomia ò Leo Demarmels alloura cun manar blers onns cun success igl restorant «Spirgarten» a Schlieren. Adegna puspe è igl anteriour gastronom a Savognin e la stad ins catta el ad Alvagni Bogn sen la plazza da golf.

Siva digl 2021 commembra digl parlamaint 

Scu gio menziuno è Carol Demarmels tratga se aint igl cantun Argovia, frequento igl gimnasi ò ella alloura ad Aschera/Schiers. «M’interesso e scumanzo a far politica vaia relativamaintg tard», ò detg la deputada. Oz saptga ella dantant quant impurtant tgi seia da sa participar activamaintg alla politica, er schi seia dad eir regularmaintg all’urna. Agl parlamaint digl cantun Argovia fò Carol Demarmels part siva digl 2021, noua tg’ella appartigna alla fracziun dalla Parteida socialdemocrata cun 23 deputos e deputadas.

Digl reminent è chella fracziun la sagond gronda siva la fracziun dalla Parteida populara Svizra tg’ò 51 commembers e commembras. An chels onns scu deputada ò Carol Demarmels inoltro 18 intervenziuns aint igl parlamaint. Ella s’angascha ainten la politica cunzont per fatgs socials, per la politica da famiglia, per paias fairas, per egualitad e per ena lescha da taglia equilibrada. La deputada è aint igl parlamaint commembra dalla cumischung dall’economia publica e taxas.

Betg parainta cugl anteriour ballapeist Otto Demarmels

Adegna puspe vigna la dumonda schi Otto Demarmels, igl anteriour giuieder da ballape digl Club da ballape Basilea, igl «FCB», seia paraint cun ella. «Chegl è el betg», dei Carol Demarmels. An ena moda seia el tuttegna paraint cun esser ensacu tot igls Demarmels pi prubabel paraints. Interessant seia tgi chella dumonda vigna adegna puspe pitost da persungas pi segls onns.

Gist igl cuntrari tar la dumonda sch’ella seia parainta cun Ricarda Demarmels, tratga se an Val Schons, e siva digl schaner 2023 la «CEO» dalla «Emmi Group» cun sedia a Lucerna. Chella dumonda vigna pitost da persungas tgi seian dalla sia vigliadetna, dei la deputada.

Scu Carol Demarmels èn er Otto Demarmels e Ricarda Demarmels stos anfignen tar la fusiun digls 9 cumegns an Surses vaschigns da Salouf e siva digl 2016 vaschigns da Surses. Carol Demarmels ò er anc menziuno tgi a Tinizong veiva cun Guido Janett anc igl cusregn da sies bab. Sies cusregn Mirco Demarmels vegia biagia avant curt ena tgesa a Tinizong. Seia ella an Surses totga ena viseta a Marmorera tigl program, cunzont perveia dalla ruigna Marmels, ò menziuno la deputada uriunda da Surses.