Ina midada spectaculara

Gliendisgis ei la maschina arrivada a Glion. La midada spectaculara alla via dil Glogn 17 a Glion ha leventau gl’interess. La stamparia communicaziun.ch ha retschiert ina maschina da stampar nova. Brattar la veglia culla nova ei denton buca in manever da paucas minutas. Grazia ad ina tecnologia innovativa e process efficients sappien ins far il futur pli grondas ediziuns e products da stampa novs, ha l’interpresa communicaziun .ch informau en connex cun quei project. «Nus vulein dar in ferm signal per la Surselva», ha il meinagestiun Armin Spescha getg e puntuau ch’els vesien el sectur da print vinavon in enorm potenzial.

Nov tonnas e nov meters

Duront 15 onns ha la maschina dalla marca Heidelberg produciu a Glion varga 120 milliuns artgas, igl ei ils gronds fegls ch’ils stampadurs han fatg per projects da mellis clients. Culla «Heidelberg» veglia ha l’equipa da communicaziun.ch produciu tut il pusseivel en quater colurs e cul sistem d’offset. La maschina nova seigi in clar manifest per la professiun dil stampadur e dils mistregns da print, ha Armin Spescha puntuau. Malgrad che communicaziun.ch hagi rinforzau avon Nadal 2024 sia purschida online cun ina agentura digitala, seigi la stampa classica vinavon ina petga decisiva, ha il meinagestiun getg.

La stamparia a Glion ei buca en in liug solitari, mobein amiez il marcau e datier alla populaziun. Tras treis grondas vitrinas san ins observar co la maschina da nov meters lunghezia «lavura», co ella gira e co ils stampadurs produceschan cun ella. Els fan cartas da viseta, artgas cun texts e maletgs per cudischs, lu stampan els flyers, placats, prospects, magazins e bia auter. Per brattar las maschinas han ins stuiu demontar ina dallas vitrinas. Ils specialists da logistica e stampa han scargar, alzau e stuschau precautamein el liug las parts dalla maschina da nov tonnas. Secapescha suenter ch’els havevan demontau ed allontanau la «Heidelberg» veglia. «Igl ei in tierm marcant ella historia da noss’interpresa», ha Armin Spescha, il fundatur e meinagestiun da communicaziun.ch manegiau.