Dar ina vusch alla populaziun

Gia varga 2000 persunas han suttascret la petiziun lantschada la mesjamna vargada che giavischa vinavon in ferm provediment da sanadad en Surselva. La petiziun online ha la partida Giuven Center Surselva lantschau via la plattafuorma petitio. «Nus vulein dar alla populaziun sursilvana la pusseivladad da s’exprimer en caussa Spital regiunal Surselva.» Quei gi Andri Bearth, in dils exponents dalla partida giuvna sursilvana.

Sulet aspectatura

Andri Bearth fa attent che la populaziun sursilvana seigi entochen ussa sulet stada aspectatura ellas discussiuns en connex cun il futur dil Spital regiunal Surselva a Glion. El e sias cuniniziantas e cuniniziants dalla petiziun online speran che l’acziun da suttascripziuns retscheivi bia sustegn e quei dalla populaziun da tuttas 15 vischnauncas sursilvanas. «Igl ei impurtont che la populaziun da tuttas vischnauncas demuossa la veglia da mantener il provediment da sanadad ch’il spital porscha en Surselva.» Aschia vesa Andri Bearth la petiziun sco segn viers las vischnauncas politicas da surprender responsabladad. «E da demussar solidaritad viers igl agen spital», sco quei ch’il giuven politicher s’exprima viers la FMR. El ei numnadamein dil meini che quella solidaritad communala en Surselva seigi ida empau a piarder ils davos onns.

Provediment periclitau

Il text dalla petiziun plidenta la schliata situaziun finanziala dad ina gronda part dils spitals en Svizra che pertucca specificamein ils spitals che sesanflan en regiuns periferas. Ils iniziants dalla petiziun ein numnadamein perschuadi ch’il provediment da basa ch’il spital porscha en Surselva ei periclitaus. «Serrar il spital muntass ina greva sperdita per nus tuts e pertuccass la qualitad da viver sco l’attractivitad dalla regiun», scrivan las politicras ed ils politichers giuvens. Ad Andri Bearth ein las discussiuns ed ils viriveris actuals en connex cun Sana Surselva e sia Reit da sanadad buca stadas tschelladas. El gi ch’il Giuven Center Surselva vegli actualmein buca prender posiziun viers la structura politica dil provediment da sanadad en Surselva. «Nus vulein semplamein dar in ferm signal a favur dil provediment da sanadad e l’impurtonza dil Spital regiunal Surselva e sia muntada per nossa regiun.»

A favur dad emploiadas ed emploiai

Andri Bearth e sias cunbattantas e cunbattants vulan denton era dar cun la petiziun in signal da renconuschientscha a favur digl engaschi dad emploiadas ed emploiai dil Spital regiunal Surselva. «Nus essan cunscients ch’il persunal s’engascha per la populaziun e quei engaschi mereta renconuschientscha.» Igl exponet dalla partida giuvna numna era la gestiun dil spital che drovi medemamein in signal da sustegn per cuntinuar cun la lavur da mintgagi che seigi buca dil tuttafatg sempla. Co e nua ch’il spital duess seposiziunar egl avegnir per dumignar las sfidas finanzialas ei buca tema dalla petiziun sco quei che Andri Bearth puntuescha. «La finala sto la representanza politica cun il spital ed experts da sanandad anflar las sligiaziuns.» Ord sia optica eis ei denton impurtont che la populaziun sursilvana survegn la pusseivladad da demussar solidaritad en caussa Spital regiunal Surselva. «Per quei intent havein nus lantschau la petiziun.» Ina petiziun che la populaziun sursilvana sa sustener entochen ils 14 da fevrer 2025.

Sana Surselva cun niev tgamun

La radunonza da delegai da Sana Surselva ch’ei seradunada la gievgia vargada a Glion ha giu d’eleger in niev tgamun suenter che Partick Schaniel ha tut surura bandunau siu post il december vargau. El ha giu fatg valer la gronda pressiun e smanatschas viers sia persuna per sia demissiun. Tgi che surpren il presidi da Sana Surselva ei aunc buca stau enconuschent sin la fin da redacziun. Il niev tgamun retscheiva en scadin cass ina greva ierta dad ulivar las undas da discrepanza denter singulas vischnauncas e lur exponents. Els ston la finala anflar la via per segirar il futur dil Spital regiunal Surselva e sia purschida. (fmr/ac)