In’ulteriura scuntrada da fugitivs ed indigens

Culla finamira da promover il contact denter las habitontas ed ils habitonts dil center da requirents d’asil el Bellavista a Mustér culs indigens ei vegnida arranschada avon dus meins in’emprema sentupada el Center Aua Viva. La finamira da quei project ei da porscher quei inscunter regularmein, sche pusseivel mintga meins. Per quei motiv ha la proxima sentupada liug gliendisdis, ils 20 da schaner 2025 dallas 14.00 entochen las 16.00, medemamein el Center Aua Viva. Sco quei che las instituziuns organisontas scrivan sin in fegl sgulont, vegn il president communal da Mustér, René Epp, a separticipar a quella. Envidaus ei in e scadin, era persunas d’ordeifer. Ei vegn purschiu caffè, te e petta. El center duei il discuors dils indigens cullas requirentas ed ils requirents d’asil esser. All’emprema sentupada miez november 2024 ein rodund 50 persunas separticipadas. Cun quella participaziun ein ils organisaturs stai fetg cuntents, sperond ch’in semegliont diember da persunas separticipeschi era allas proximas sentupadas. (fmr/hh)