Surselva Maraton e Swiss Cup la medema fin d’jamna
La fin d’jamna dils 25 e 26 da schaner 2025 ei Sedrun il Mekka dalla cuorsa liunga svizzer. Lu semesiran las curridras ed ils curriders numnadamein en ina concurrenza dil Swiss Cup ed al Surselva Maraton. Il comite d’organisaziun cun Guido Friberg alla testa porscha denton era concurrenzas d’affons el rom dil Raiffeisen Nordic Cup e dil Cup Energia alpina. In tema che fatschenta il comite d’organisaziun ei sia successiun.
Cun organisar il Surselva Maraton, cuorsas dil Swiss Cup, concurrenzas d’affons e giuvenils ni era il campiunadi svizzer da cuorsa liunga dils seniors ha Tujetsch recaltgau bia savida e publicitad sil sectur dalla cuorsa liunga. Las stentas fatgas ils davos onns d’in tschuppel persunas vegnan cuntinuadas uonn. La davosa fin d’jamna dil schaner, ils 25 e 26, stattan dus dis intensivs cun pliras concurrenzas sil program. El center ein il Surselva Maraton e las cuorsas dil Swiss Cup (mira era box).
Bunas relaziuns
«Las relaziuns da neiv ein bunas il mument. Sco ei vesa ora actualmein duessen quellas cundiziuns semantener era l’jamna vegnenta, damai che las temperaturas restan relativamein bassas», di Guido Friberg, il president dil comite d’organisaziun. Bunas relaziuns ein necessarias, pertgei il program che vegn purschius ils dus dis ei gronds. La sonda han liug ina cuorsa dil Swiss Cup, sco era quellas dils affons e giuvenils el rom dil Raiffeisen Nordic Cup dall’Uniun da skis grischuna sco era il Cup Energia alpina. La dumengia suonda il 35avel Surselva Maraton sur la distanza da 25 km e per la 13avla ga las cuorsas d’affons e giuventetgna. Il Surselva Maraton vegn medemamein valetaus el Swiss Cup. «Swiss Ski ha pli e pli difficultads da cattar organisaturs per las cuorsas dil Swiss Cup. Consequentamein essan nus stai dil meini che nus sappien cumbinar ellas culla fin d’jamna dallas cuorsas d’affons e giuvenils sco era dil maraton», di Guido Friberg. Il Swiss Cup ei dedicaus a curridras e curriders da differentas categorias sut 23 onns.
Denter 200 e 300 participonts
Sulet per las cuorsas dil Swiss Cup serendan rodund 100 curridras e curriders la fin d’jamna a Sedrun. «Pil Surselva Maraton sco cuorsa populara el rom dil Swiss Loppet spitgein nus rodund 200 curridras e curriders. Ensemen cun quels dil Swiss Cup astgess ei esser rodund 300», declara Guido Friberg. La gronda massa d’annunzias hagi ei aunc buca: «Quei ei denton normal aschia. Igl ei pli e pli aschia che las curridras ed ils curriders sedecidan a cuorta vesta da separticipar, biars schizun pér la damaun avon la cuorsa.» Pils organisaturs seigi quei ina gronda sfida: «En sesez eis ei adina grev da giudicar cons che vegnan la fin finala.» Igl onn vargau eran rodund 150 curridras e curriders stai alla partenza dil Surselva Maraton.
Ulteriuras informaziuns: surselva-marathon.ch
Co vinavon culla cuorsa liunga en Val Tujetsch?
Dapi plirs onns secumpona il comite d’organisaziun dil Surselva Maraton dallas medemas persunas: Guido Friberg, Toni Cathomen, Monika Bearth, Esther Nufer e Karin Bär. Suenter il maraton digl onn vargau ei la damonda dalla successiun setschentada. «En sesez calassen nus bugen. Per garantir la successiun dil maraton e las autras cuorsas eis ei denton buca reussiu d’anflar successuras e successurs per l’organisaziun. Igl onn vargau havein nus aunc giu da slignar cullas cundiziuns», di Guido Friberg. Davart la vischnaunca da Tujetsch vegni ei beneventau da mantener las cuorsas. «Nus essan s’entupai cun representants dalla vischnaunca ad ina meisa rodunda. La fin finala havein nus decidiu da cuntinuar per in onn, suenter il maraton d’uonn vesin nus sco ei va vinavon», di Guido Friberg.
In factur seigi segiramein era il diember da participontas e participonts al maraton: «Igl engaschament ed ils cuosts munglassen star en ina buna relaziun cul maraton sez. Tendenzialmein sereducescha il diember da curridras e curriders generalmein era ad autras cuorsas.» Buca sempel seigi ei denton era da cattar voluntarias e voluntaris per ils dis avon, duront e suenter las cuorsas. «Biaras e biars da quels ein sils onns. Capeivel ch’els ein era buca promts da s’engaschar senza fin», constatescha Guido Friberg. Ch’ei seigi iu bein ils davos onns attribuescha el al bien spért da collaboraziun enteifer il comite d’organisaziun ed il sustegn da biaras e biars: «Plirs da nus han era giu affons ch’ein stai ni ch’ein aunc activs ella cuorsa liunga. Quei ha segiramein era motivau da s’engaschar.» (fmr/hh)
Gust da leger dapli?