«Ün dachesa da pioniers – taunt pü bod scu eir hoz»
I’l Château Papillon s’ho gieu in marculdi saira l’occasiun da der ün prüm sguard i’l concept ed ill’exposiziun a partir da favrer. Suot il nom «Blockhütte» preschainta la gallaria e lö d’inscunter a San Murezzan quist inviern üna retrospectiva sün las prestaziuns da pionier da San Murezzan e fo üna punt i’l preschaint cun preschanter nouvas tecnologias cul potenziel da pionier.
Quists dis s‘haun chattos ils «big players» dal muond da cripto a San Murezzan per la Crypto Finance Conference St.Moritz, chi’d ho lö dals 15 schner als 17 schner 2025. In quist’occasiun ho il Château Papillon – ün lö d’inscunter e gallaria a San Murezzan –organiso üna pre-avertüra da lur program d’inviern, chi tratta traunter oter eir nouvas tecnologias e lur pussibiliteds. Ma na be que.
«La Blockhütte i’l Château Papillon es ün concept, chi metta a San Murezzan e l’Engiadina i’l center scu lö da prestaziuns da pionier. Cun diversas exposiziuns, discuors ed occurrenzas tematicas vulainsa musser la richa istorgia scu eir il potenziel da tuot la regiun», disch Mic Schneider, mainagestiun dal Château Papillon.
Ün sguard inavous ed inavaunt
Il Château Papillon dvainta perque düraunt tuot l’inviern svess tar la «Blockhütte» e quella as preschainta sün duos plauns. Sül seguond as rechatta üna retrospectiva istorica, curateda da Diana Pedretti, chi vain inaugureda ufficielmaing in favrer. Ella ho trapartieu las numerusas prestaziuns da pionier in ses champs tematics, nempe sport, societed, tecnologia, turissem, persunaliteds, art ed architectura. Traunter oter vain preschanteda la prüma glüsch electrica da la Svizra, chi’d es gnida impizzeda l’an 1879 a San Murezzan, ils Gös Olimpics, ma eir da tuottas sorts da sports cuntschaints chi sun gnieus inventos a San Murezzan.
La punt dal passo i’l preschaint es la s-chela dal seguond plaun i’l prüm plaun da la Blockhütte, inua cha’s vain a savair dapü da nouvas tecnologias in connex cun blockchain ed intelligenza artificiela e lur pussibiliteds. Uscheja preschainta lo Boris Smiljić sieu start up cul nom «EleaTek». Quel nom as cumpuona dad Elea – la deessa greca da la charited –e «tek» per tecnologia.
Donaziuns cun transparenza
«Que’s tratta d’üna plattafuorma da tecnologia per donaziuns ed investiziuns, chi pussibilitescha üna transparenza cumpletta – uscheja cha que’s riva da perseguiter per 100 % inua cha’ls raps vegnan druvos», disch Boris Smiljić. El agiundscha cha’l grand problem in quista branscha es la fiduzcha in organisaziuns e cha’ls donatuors nun haun a la fin mê propi la sgürezza cha lur raps vegnan eir druvos pel scopo giavüscho. Tenor Boris Smiljić as vezza quist sentimaint impustüt tar tals millenials e las generaziuns edgeneraziuns alpha.
In l’exposiziun da la Blockhütte as preschainta «EleaTek» cun divers purtrets e fotografias, chi vegnan cul telefonin ed üna app vivs, e raquintan ün’istorgia. Traunter oter ün god, ün champ da fügitivs ed ün liun. Dimena tuot tematicas cha vegnan ramassos raps d’organisaziuns. Il purtret in reel sainza handy lascha suppuoner cha que es üna buna roba, ma cun render viv il purtret as vezza davous las culissas e cha’s vain minchataunt eir ingiano. Che chi resta es üna melsgürezza.
Motiver ed inspirer ad oters
«Tar nossa plattafuorma as survain eir uschè «Emotional rewards». Que’s tratta da puncts, chi indichan per che cha que s’ho duno raps, que es visibel publicamaing. Uscheja as dess alura eir ragiundscher ad otras persunas chi vöglian duner per üna tscherta chosa», disch Boris Smiljić.
Tenor il mainagestiun dal Château Papillon as drizza la «Blockhütte» a la populaziun indigena, a dittas da tecnologia scu eir a tuot ils giasts internaziunels. Mic Schneider disch: «Nus vulainsa musser cha Engiadina nun es ‹be› üna destinaziun turistica, dimpersè cha la val possa eir esser il dachesa da pioniers – taunt pü bod scu eir hoz.»
Zieva la pre-avertüra da la «Blockhütte» in marculdi passo, as po ir a visiter l’exposiziun a partir da favrer adüna in gövgia, venderdi e sanda – da las 15.00 a las 19.00 i’l Château Papillon a San Murezzan.
Gust da leger dapli?