Premis per Erica Bivetti e Gianni Tschenett

La pittura da Samedan, Erica Bivetti, survain il premi d’arcugnuschentscha da la Regiun Malögia 2024. Cul premi vain onureda sia lavur creativa chi saja da granda expressivited. «In sieu purtrets ans muossa ella, cu cha’l muond pudess esser unieu in tuot sias culuors e sias variaziuns», scriva la regiun Malögia in üna comunicaziun. La granda energia cha la pittura metta in sias ouvras saja impreschiunta. Il premi d’arcugnuschentscha es doto cun 10 000 francs. Cha l‘artista vöglia nüzzager quels raps per elavurer ün cudesch illustro davart sias ouvras, es legia illa comunicaziun.

Premi da promoziun per Gianni Tschenett

Il premi da promoziun da la Regiun Malögia survain il chantautur Gianni Tschenett. El es creschieu sü a Schlarigna, ho absolt l’Academia Engiadina ed hegia fingià scu iffaunt fat musica. I’ls ultims ans ho el pudieu s’etablir scu chantautur e scu chantadur in differentas bands. Sper balladas scriva el eir adüna darcho chanzuns sociocriticas. Actuelmaing stüdgia el musica da rock/pop a la Scoul’ota d’art a Turich. Insembel cun RTR ho Gianni Tschenett registro duos songs rumauntschs. Il premi da promoziun es doto cun 5000 francs. (rtr/fmr)