Anna Jäger per Donat Nay

«Ils responsabels dalla Casa s. Martin a Trun s’organiseschan da niev per esser semtgai per l’integraziun dil menaschi ella Reit da sanadad Surselva. La partenza da quella ei previda l’entschatta 2027», scriva la cumissiun casa en ina communicaziun als mieds da massa. La consequenza: «Il meinacasa Donat Nay va ella pensiun anticipada, pia in onn avon sia pensiun ordinaria. La cumissiun casa ed il meinacasa Donat Nay han decidiu communablamein quei pass e miran anavos sin ina collaboraziun reussida e plein confidonza.»

Anna Jäger surpren

Anna Jäger surpren la direcziun dalla Casa s. Martin a Trun igl emprem da fevrer 2025 e daventa aschia successura da Donat Nay. Ella ei gia engaschada ella casa e quei sco menadra da qualitad. «Ei legra nus zun fetg che nus havein anflau en Anna Jäger ina persuna qualificada per nossa plazza sco meinacasa. Il sacados d’Anna Jäger ei emplenius cun profunda savida sil sectur da sanadad, da menar persunal e squadras, sco era sil sectur dil management da qualitad», scriva la cumissiun casa.

Vuliu informar ils pertuccai

Sin damonda dalla FMR ha il vicepresident dalla cumissiun casa, Patrick Schaniel, explicau quella midada che succeda gia en diesch dis: «Communablamein cun Donat Nay havein nus analisau la situaziun. Tenor vegliadetgna fuss el ius en pensiun la primavera 2026. El havess pia bandunau la casa rodund in miez onn avon che quella fuss daventada ina part dalla Reit da sanadad Surselva, quei che fuss buca stau ideal. Plinavon constatein nus ch’igl ei grev d’anflar ina persuna qualificada per quella funcziun. Cun Anna Jäger ei sedada la situaziun da saver engaschar ina persuna ch’enconuscha gia il menaschi. Quei po esser empau surprendent. Nus havein denton vuliu informar igl emprem tut ils pertuccai avon ch’orientar la publicitad.» La decisiun seigi vegnida prida el decuors dallas davosas jamnas.

Persuna qualificada

Sco la cumissiun casa scriva, disponi Anna Jäger d’ina fetg buna qualificaziun. Da quei san ins era seperschuader sin sia homepage persunala. Da 2013 entochen 2023 eis ella stada meinafatschenta dall’Associaziun dil center per attempai Kreuzlingen. En quei temps ei la capacitad da quei center vegnida augmentada da 150 sin 234 plazs da tgira, il diember da collaboraturas e collaboraturs ei carschius da 180 sin 330. Anna Jäger ei seperfecziunada el coaching, svilup d’organisaziun, management da qualitad, sco persuna cun cumpetenza da menar persunal ed informatica. Ella ei economa da menaschi. «La cumissiun casa e la direcziun dalla Casa s. Martin sco era il persunal selegran da collaborar culla nova meinacasa e quei sut il motto d’Anna Jäger sezza: star ensemen – ir ensemen», scriva la cumissiun casa. L’entschatta avrel 2025 survegn la Casa s. Martin era ina nova menadra dalla tgira. Quella funcziun surpren Alexandra Quinter.

Donat Nay pren cumiau

Il meinacasa partent Donat Nay meina la Casa s. Martin dapi igl onn 2017. Sco quei che la cumissiun casa scriva, ha el gidau a sviluppar la Casa s. Martin en quei temps: «Sut sia direcziun ein vegni realisai numerus projects. Cun agid dil persunal ha el menau la casa cun grond dun ed inschign atras la pandemia da corona.» Siu engaschi seigi vegnius appreziaus generalmein. «Nus engraziein grondamein a Donat Nay per siu engaschi e giavischein ad el tut bien e buna sanadad sin sia via privata sco pensiunau»,  vegn il president dalla cumissiun casa e dalla Fundaziun Casa s. Martin, Daniel Tuor, citaus ella communicaziun als mieds da massa.