«Jeu mierel dalla seit»

Urs Abgottspon veva el num. E stau eis ei avon biars onns. En in cantun sulegliv da nossa tiara. Jeu erel expert d’ina concurrenza per musicantas e musicants d’instruments a flad. Per principiants, per avanzai e per miez profis. Ina gronda paletta. Biars giuvens, paucas giuvnas da gliez temps. En differentas categorias. Tenor vegliadetgna.

Nus vesevan las musicantas ed ils musicants. Quei vevel jeu bugen. Oz zuppan ins pil pli la giuria davos ina tenda. Per ch’ei seigi propi neutral ed objectiv. Jeu stoi era veser quels che sunan. Ils moviments dil tgierp. La posiziun dils peis. La detta. Ils egls. L’expressiun dalla fatscha.

Urs Abgottspon ei vegnius en tur. Il num enconuschevel jeu aunc buc. Mintgin veva ina numera. Quei per garantir l’objectivadad dalla giuria. Sco sch’ei dependess da quei. Jeu enconuschevel buca las persunas sin tribuna. Buc olma.

El veva dudisch onns. In buobet plitost. Satels e zaclins. Tuttenina sin ina gronda tribuna. Tut persuls. Mo cun sia trumbetta. El ei sefermaus in tec pli anavos che ses collegas ed ha ruchegiau il portanotas. Ed ha mirau in amen sin la fuola. In representant dalla regenza. Il president da vischnaunca. Il plevon. Il president dall’uniun cantunala da musica. Ed auters hosps. Tuts beneventai specialmein all’entschatta. E biaras audituras e biars auditurs. Dil vitg. Dalla regiun. Digl entir cantun. La concurrenza veva calamita.

Buca quels han schau crescher la febra digl Urs Abgottspon. Na. Ses amitgs, ses geniturs, ses fargliuns, siu tat e sia tatta. Ina retscha entira. Tuts eran leu cun bucca aviarta, egls tarlischonts ed ureglias gizzadas. Tuttas e tuts cun luschezia e gronda spetga. Ed el leva buca trumpar. Cunzun els buc. Cunzun oz buc. En sia emprema concurrenza, per la quala el era sepreparaus duront dis e meins. Oz leva el mussar. Forsa ch’el era buc il pli spert da cuorer. Forsa aunc pli fleivels en dar bal. Mo el saveva sunar. Ed oz leva el esser enzatgi. Mussar enzatgei. Quei scheva sia fatscha, irradiavan ses egls.

Urs entscheiva a sunar. Igl emprem tun ei temeletgs e maghers. El ha buca flad e maguol. Mo il mied serevegn ed empermetta. L’emprema passascha en rocla arriva. Ils tuns sescarpetschan, cupetgan, sespiardan. Ina pintga stendida dallas levzas. Ils tuns mieran. In sbagl cloma in auter. La fatscha vegn cotschna. Ils egls enqueran las notas. Pauper Urs. Sche quels en sala savessen, tgei ch’ei munta da stuer sunar avon tons. Ed avon experts cun fatschas seriusas. Cheu gida era in’egliada encuraschonta dil palancau anora pauc pli. La febra crescha e surpren il domini. Igl ei da star mal. Concurrenzas san esser brutalas. Per quels ch’han buca gnarva sco sughets.

Urs Abgottspon, ti eras en perfetg. En tia battaglia encunter la febra che paralisava. Ti che dumignavas segiramein tiu toc a casa. En tia combra. Sco da beiber aua. Ti has smaccau cun forza il buchin encunter tias levzas. Ti has brancau aunc pli ferm la trumbetta. E teniu quella encunter tei. Sco in affon. Ella che pareva tresta. Senza la glischur dil dorau. Ti has mirau sin ella. Sin nus. Sin tias notas. Giu viers la retscha culs tes. Paralisai era els. Cun bucca aviarta ed en fatalitad.

La febra veva disturbau igl equiliber. Schigentau bucca e levzas. Stinschentau ils tuns. Tuttenina in griu da desperaziun: «In glas aua, jeu mierel dalla seit.»