Mecanist, pilot, guid – ed aunc bia auter

«Mia veta professiunala ei stada intensiva e variada. Sch’jeu stessel aunc inagada all’entschatta mettessel jeu il focus sin l’aviatica che ha adina fascinau mei il pli fetg da tut quei ch’jeu haiel fatg.» Quei di Peter Cadonau da Flond ch’ei pilot d’aviuns pigns e che sgulava d’ina destinaziun a l’autra all’entschatta dils onns 1990, cura ch’el era manager tecnic d’ina interpresa da textilias en Kenia. Sgular era la varianta per vegnir da suandar a tut ils termins.

Ina carriera da siemi

La carriera professiunala da Peter Cadonau, che ha oz 63 onns ha entschiet a Glion. Leu ha el empriu  da mecanist da maschinas agricolas. El ha luvrau sco mecanist d’aviuns e helicopters a Dübendorf. Biars onns eis el staus manager tecnic cun responsabladad per persunal e responsabladad finanziala tier pliras interpresas en Svizra ed ell’Africa.

Ed ils davos onns avon che fundar l’agentura da sport ha Peter Cadonau luvrau sco meinafatschenta tier l’interpresa Coca Cola/Aua da Val en Val Sogn Pieder. Sper tut ils bials muments hagi ei era dau crisas en sia veta, di il bab da da duas feglias carschidas. «La pli gronda crisa ei senza dubi stau miu accident da skis a Sursaissa cun ina ruttadira dalla totona.»

«Ei va buca datti buca»

Peter Cadonau ei carschius si a Flond e habitescha cun sia partenaria en siu vitg nativ dapi ch’el ei turnaus igl onn 2009 dalla Bassa ed ha supriu duront treis onns la gestiun dallas pendicularas Sursaissa Mundaun. Duront ses onns egl jester ha el denter auter frequentau in studi d’inschignier en economia, absolviu la scolaziun sco tecnicist mecanist e pli tard sco specialist da pendicularas cun diplom federal.

Pli baul haveva Peter Cadonau fatg la licenza da sgular cun aviun e la patenta da salvament cun helicopter. En discuors cun la FMR ha el accentuau ch’ei drovi adina la scolaziun adequata, sch’ins vegli far ina carriera professiunala. «Jeu haiel adina sescolau per vegnir tier mias finamiras. Ei ha dau onns ch’jeu mavel tschun seras per jamna e la sonda avonmiezdi a scola sper la lavur sil mistregn.»

El cussegli era als giuvens ch’el vegni ussa en discuors d’empruar da realisar lur finamiras professiunalas cun sescolar, e quei ad uras e buca pér cun 50 onns, di il menader da Cadventure: «Ei va buc, quei ei per mei ina stgisa. Quella stgisa vala nuot. Ins sto empruvar e haregiar. Sch’ei va lu propi buc, san ins aunc adina calar ni far zatgei auter.»

Il sport sco salvament

«Per mei ei il far sport staus in grond agid en buns e pli grevs temps professiunals.» Il far sport giuadora ella natira hagi accumpignau el sc’in fil tgietschen duront si’entira veta entochen dacheu e quei vegni a restar aschia, di Peter Cadonau.

«Jeu sun carschius si cul sport e sun ius tut ils onns digl emprendissadi cun miu velo da Flond a Glion ed anavos la damaun, da miezdi e la sera.» Il velo seigi in da ses megliers amitgs, raquenta el.

Ir en pensiun ei negin tema

«Cadventure vegn era a porscher egl avegnir guidas, cussegliaziuns e scolaziuns la stad cul velo ed igl unviern sil sectur dalla cuorsa liunga e dallas turas cun skis», di Peter Cadonau  El e siu team da famiglia ch’ei era il team da Cadventure vegnan a cuntinuar cun l’agentura era suenter sia pensiun igl onn 2026. «Jeu haiel buca pér gest entschiet per schon calar en in onn.

Vitier vegn che jeu haiel in fetg bien team cun mia partenaria Judith, mes frars Toni cun partenaria e ses fegls a e Gion e siu fegl. Tuts vulan cuntinuar.»