SST Menzlisport Cup a Mustér

La sonda vargada havein nus, il Club da skis Mustér, astgau organisar duas cuorsas da slalom dil Menzli Sport SST JO Cup (annadas 2013 entochen 2009) el territori da skis a Caischavedra. Nus havein astgau porscher igl emprem e secund JO Cup da fina bialaura e da cundiziuns da pista grondiusas. Las skiunzas ed ils skiunzs han astgau guder in di da cuorsa perfetg. Il pli spert temps dil di egl emprem percuors ha Luca Candrian da RG Laax Ski contonschiu ed el secund percuors ha Livio Vincenz da JO Breil-Vuorz giu il pli spert temps. Nus lessen engraziar cordialmein allas Pendicularas Mustér SA, als sponsurs sco era a tuts ils voluntaris ch’ein segidai.

Il Club da skis Mustér organisescha regularmein cuorsas el rom dil Menzli Sport SST JO Cup. Per la classa JO vegnan en tut quater cuorsas organisadas. La proxima cuorsa ha liug ils 2 da fevrer a Val S. Pieder  e vegn organisada dil Club da skis Val. Ils 23 da fevrer 2025 astgan ils giuvenils absolver la cuorsa a Laax che vegn organisada dil RG Laax Ski. Il final ha liug ils 23 da mars 2025, medemamein a Laax. Responsabels pil final ei il Flimserstein Race Team.

Katrin Pally, Club da skis Mustér