Collisiun cun trais veiculs

CDM/FMR

In marculdi zievamezdi ho que do ün accidaint da trafic cun trais autos a Zuoz. Ün automobilist dad 82 ans giaiva cun l’auto intuorn las 14.10 da Madulain in direcziun da Zuoz sur la via laterela. Süll’otezza da Champatsch è’l tenor üna comunicaziun da la Pulizia chantunela dal Grischun rivo tar üna stüerta a schnestra sur la mited da la via ed es collido cun ün auto d’ün hom da 69 ans. Ün oter manaschunz da 69 ans in direcziun da Zuoz es auncha rivo illa part davous da l’auto da l’hom dad 82 ans. La passagera da l’hom dad 82 ans s’ho ferida mez greiv düraunt las collisiuns ed ho stuvieu gnir mneda dal salvamaint Engiadin’Ota in l’Ospidel Samedan. La passagera da l’auto chi gniva incunter es gnida mneda a l’ospidel d’üna seguonda ambulanza dal salvamaint Engiadin’Ota per üna controlla. La Pulizia chantunela dal Grischun sclarescha la chaschun da l’accidaint.