Columna or dal mund: Il luxus d’electricità ed aua

Il sen da luxus as stramüda culs ons. Meis sen da luxus s’ha transfuormà enorm daspö ch’eu viv a Trinidad. Viver in üna part giò d’via sün ün’isla pitschna porta cun sai diversas sfidas: la schelta da mangiativas in butias es plütost pitschna, tscherts prodots nun existan. Restorants sun rars e butias da büschmainta, apotecas e dafatta la posta as rechattan illa pitschna cità chi’d es ün’ura davent da quia. Cumbain ch’eu am giavüschess minchatant la comodità d’avair tuot in vicinanza, meis plü grond luxus es d’avair electricità ed aua currainta.

Cuntuot cha la situaziun cull’electricità s’ha amegldrada considerabelmaing i’ls ultims ons, almain duos fin trais jadas al mais suna sainz’electricità. Minchatant per ün pêr uras, minchatant per ün inter di. Respunsabel per quist disgust po esser ün bös-ch chi’d es cupichà süls cabels d’electricità, ün ferm vent o eir blera plövgia. Qualjadas nu daja neir ingüna buna radschun, e l’unica soluziun es d’acceptar la situaziun e spettar fin ch’ün dals veiculs gelgs passa, il servezzan da la rait electrica. Dimena, sainz’electricità nu daja neir ingüna rait da handy.

La situaziun cull’aua currainta para da pegiorar dad on ad on. Eu sun daplü sainz’aua co cun aua, schabain cha no eschan circundats d’aua. La cuolpa per quista situaziun es la noscha mentalità da lavur sün quist’isla. L’aua currainta vain da las funtanas da las muntognas a l’intern da Trinidad e passa tras ün sistem da filter avant co rivar aint illas chasadas. Schi plouva bler, porta l’aua cun sai romma e föglia, ed ils filters ston lura gnir pulits suvent. Per spargnar quista lavur fadiusa serran ils lavuraints ils condots, e tils drivan lura pür darcheu cur cha’l sulai arda e la terra es sütta. La stagiun da plövgia düra per furtüna be ses mais.

Eir sch’eu sun drizzada aint a chasa cun ün pitschen implant solar e cun tancs d’aua, ma il plü grond luxus es d’avair electricità ed aua currainta. E quai al listess mumaint.