Ellas malegian an duas igl madem maletg

Pigl curàntavel aniversari da sieus atelier d’anramar maletgs â Alexander Buchli anvido sia feglia Aurelia a sia cumpogna da scola Miriam Geissdörfer da far egn’exposiziùn cun lur maletgs.

«Notgs polaras» e’l igl tetel da quella mustra d’egn tozel maletgs. Igl e egna schelta digls 22 maletgs c’ellas duas ân picturo igl curs digl on passo. Par grànda part eni figurativs, mo anqualegn ear abstract. La calur dominànta e la blaua, sper igl cotschen rosa da las levadas digl sulegl. Igl blau exprima bagn igl cler fred da las notgs stelidas digl nord. Davànttier e’gl savens da vaser las undas da la mar ca samovan anviers planiras blauas, or da las qualas igl sasòlza muntognas ca paran da s’unir cugls nivels a cugl tschiel nocturn leavameing ilumino da la glisch polara ca bogna la cuntrada an amparnevlas variaziùns blauas.

La fasa blaua

«Blau e pigl mumaint nossa calur preferida», palainta Miriam Geissdörfer, la pedagoga da movimaint oriunda dad Alpnach ad amatura da la Norvegia. «Ella exprima bagn tànt igl stgir sco ear la quieteztga da quellas notgs.» Ad Aurelia, ear ella amatura digl blau, aschunta: «Jou ve gea d’egn tains annà egna fasa blaua. Cugl blau pon ign exprimer tàntas niànzas. El dat profunditad agl maletg. D’egna vart â’l egn caracter pasànt, melanconic a trest, mo da tschella ear anzatge leav a legher.»

Dantànt manegian las picturas ca lur fasa blaua segi terminada. Cuntinuànd lur lavur, viglian ellas sadeditgear d’otras calurs, magari digl verd ca la glisch polara darasa pigl sòlit.

Egna cunlavur pretensiusa

Igl ple faszinànt da lur lavur e’gl, ca las duas amitgas malegian adigna an duas igl madem maletg. Amaduas ân egna stànza da malagear a tgea-lur, Aurelia a Schlieren a Miriam a Sarnen. Alternativameing s’antopan ellas egn’eada qua, egn’eada tscha, par stgafir da cuminànza lur maletgs – egna moda a maniera da malagear ca fa surstar.

Mo ellas s’ancanuschan da 22 ons annà, peia digl tains, ca las duas amprendistas cusùnzas frequentavan la scola professiunala. Malagear e egn passatains da mintgegna, a scadegna â egn agen stil ca sadisfranztgescha digl cuminevel.

«Nus rivagna resultats nunspitgieus»

«L’ideia da malagear da cuminànza e naschida avànt tres ons par spir plascher da scuvrir anzatge nov», tradescha Miriam. «Igl â funcziuno bagn, parquegl vainsa dezidieu da cuntinuar.» Ellas lavuran magari plirs gis ve dad egn maletg. «Nus vagn dantànt cato adavur, ca malagear an duas e anrihànt: Nus rivagn a resultats nunspitgieus, parquegl ca tschella veza pussevladads, c’ign sez veza betg. Ascheia dainsa adigna puspe impuls novs l’egna a l’otra. Igl e egn experimaint captivànt», gi Aurelia Buchli c’e oriunda da Scharons a lavura da 12 ons annà sco szenografa, vut gir ella fa maletgs da tribunas a requisits par films. Dantànt â’la fatg la szenografeia par var trainta films sco p.ex. plirs «Tatort». Natiralmeing ca que prozeder da malagear pretendi egna bùna comunicaziùn trànter ellas a l’abilitad d’aczeptar critica. «Ad igl ple beal resultat e quel, ca la nossa amizeztga e vagnida ple stretga», concluda Aurelia ca mussa igl sieus amprem maletg, fatg da matatscha, ca palenda ussa sper igls ple novs.