En hotel migler tgi l’oter

«Holidaycheck» è ena plattafurma internaziunala noua tg’è pussebel da reservar per pernottar ainten en hotel. Da cumparagler è chella plattafurma er cun otras scu per exaimpel «Booking.com» u er «Trivago» etc. Per mintga hotel èn chellas plattafurmas oz essenzialas, cunchegl tgi cunzont giasts digl exteriour fon adiever da chellas plattafurmas. Tenor las infurmaziuns digl post da medias dall’organisaziun tetgala Hotelleriesuisse schea igl domber da reservaziuns tgi vignan fatgs sur chellas plattafurmas tar tuttegna 49%. An spezial igls hotels ainten martgeas on giasts tgi reservan lour pernottaziuns via las plattafurmas – en po pi pac vignan reservos hotels dallas destinaziuns da vacanzas via talas plattafurmas. Tar chels vign la prenottaziun reservada per 59% per telefon, e-mail, formular u direct sur la pagina d’internet digl hotel.

Gio per la 20avla geda

Igl èn ossa gio 20 onns tgi la plattafurma «Holidaycheck» premiescha mundial igls hotels igls pi populars. Chest onn èn neidas examinadas mundialmaintg 837 700 valetaziuns e retschet persiva en premi u detg oter en award on 685 hotels ainten 35 teras. Tranter oter èn er nias premiias igls diesch pi populars hotels dalla Svizra. Scu gio igls davos onns on valia er actualmaintg angal las taxaziuns digls giasts, tg’èn neidas fatgas pigls hotels sur la plattafurma. Per neir an dumonda pigl premi 2025 da «Holidaycheck» on igls hotels gia da retschever aglmanc 50 valetaziun, chegl digl 1. da december 2023 anfignen igls 30 da november 2024. Ultra da chegl on igls hotels er gia d’aveir aglmanc 90% digls giasts tg’on cunsiglia da far vacanzas u pernottar ainten chels hotels.

Adegna puspe alla testa digls schinumnos rankings

Gio decennis egna dallas miglras adressas è igl hotel Schweizerhof a Lai. La tgesa ò ena tradiziun da 120 onns e siva da passa 30 onns magnan Andreas e Claudia Züllig igl hotel da quatter steilas cun passiun, cun bler cor e cun chito digls giasts. Igls davos treis decennis ò igl pêr retschet adegna puspe premis per igl sies hotel. Tar schinumnos rankings è igl hotel Schweizerhof adegna puspe rango tranter igls miglers, gist schi sa tracta da hotels per famiglias.

Tar la rangaziun actuala da «Holidaycheck» figurescha igl hotel Schweizerhof segl amprem plaz digls diesch miglers hotels dalla Svizra. Avant en onn anc sen plaz quatter e chest onn damai alla testa dalla rangaziun. Fascinos seian igls giasts cunzont dallas tgombras andrizzadas cun bler stil modern, en scharm alpin e cun bler’amour per mintga pitschen detagl. Ultra da chegl lodan e taxeschan igls giasts fitg ot la part da spa e da wellness cun ena grondezza da 1500 meters quadrat.

Da menziunar è tgi igls davos decennis on Andreas e Claudia Züllig fatg adegna puspe investiziuns pi grondas aint igl hotel, tot chegl pigl bagn digls giasts. Remarcabel è er tgi ainten la tgesa da quatter steilas lavouran siva da ples onns igls madems collaboratours e las mademas collaboratouras. Alla front operativa digl travagl èn ossa siva da prest dus onns Michelle Juker e Jamie Rizzi, cun tgirar Andreas e Claudia Züllig anc pi fitg lour blers giasts fidevels ed er oters.

En ulteriour hotel surmiran sot igls top 10

Per l’amprema geda figurescha igl hotel Maistra da Puntraschigna ainten la rangaziun da «Holidaycheck». L’avertura da chel hotel è stada igl aton 2023 ed igl bietg è nia construia tenor igls plans da Gion. A. Caminada, igl architect da renom da Vrin. Chel hotel cun 36 tgombras e ples suitas è rango sen plaz treis. Da Surmeir sa catta betg angal igl hotel Schweizerhof sot igls top diesch, mabagn er igl hotel Guarda Val a Lai, ena tgesa fitg singulara cun ena fitg bunga cuschigna.