Ils hotels han fadigia

Ella ei stada in tec ina surpresa, l’annunzia dalla mesjamna vargada ch’il Hotel La Siala a Falera siari definitiv las portas la fin mars 2025. Quei suenter ch’ils possessurs Roland Anderegg, Armin Casutt, Gion Candreja e Max Bachofen han investau ils davos nov onns «plirs milliuns francs» ella renovaziun e manteniment dil hotel sco quei che Roland Anderegg, il president dil cussegl d’administraziun dil hotel puntuescha. Treis motivs principals numna el che hagien impediu da realisar l’idea d’antruras da segirar a Falera il sulet hotel en vischnaunca.

Cuorta sesiun aulta

«La sesiun che cuozza naven da miez december entochen Pastgas ei memia cuorta.» Roland Anderegg menziuna las duas stads da corona nua che la plipart dalla Svizra ha sfurzadamein fatg vacanzas ella patria e che ha era purtau al Hotel La Siala hosps ed entradas cuntenteivlas. «Suenter corona ei la sesiun da stad curdada en tschaler.» Ils possessurs dil Hotel La Siala han era stuiu far stem ch’il sistem dil hotel d’appartement dil La Siala che deriva dils onns 70 funcziuna buca pli. «Quei sistem ei buca da paregliar cun in Rock Resort a Murschetg nua ch’ils possessurs dallas habitaziuns san mo far diever duront in cuort temps dall’atgna habitaziun.» Roland Anderegg gi ch’ils possessurs dallas habitaziuns colligiadas cun il La Siala hagien occupau ils habitadis duront la sesiun aulta. «Al menaschi da hotel ein biaras habitaziuns stadas a disposiziun sulet duront la dentersesiun.»

Persunal qualificau

In auter problem vesa Roland Anderegg egl engaschi da persunal qualificau. «Jeu manegel ch’in hotel ella grondezia dil La Siala selai menar sulet sco menaschi da famiglia.» Confamigliars ch’ein silmeins per part buca suttamess a stricts temps da lavur e promts da s’engaschar sur mesira per il menaschi duront la sesiun aulta. El gi ch’els sco possessurs hagien era empruau da vender igl edifeci. «En vesta dalla valur da recav dil hotel ina caussa nunpusseivla.» Roland Anderegg puntuescha ch’ils investurs seigien stai pertscharts gia all’entschatta da buca far gronds gudogns cun il hotel. «Nossa finamira ei stada da mantener il sulet hotel da Falera e da scriver silmeins ina nulla nera.» Quella nulla nera ei denton buca severificada aschia ch’ils possessurs pondereschan ina midada da nez. «Pil mument eis ei aunc memia baul da communicar en tgei direcziun ch’ei va.»

Plirs menaschis en vendita

Il La Siala ei momentan buc il sulet menaschi da hotel che siara sias portas la fin dalla sesiun d’unviern. Quei vala era per il Hotel Postigliun ad Andiast demai ch’ils possessurs Guido e Corina Sgier van en pensiun. Auters hotels sursilvans ein actualmein en vendita sco in’egliada sin la pagina da RealAdvisor tradescha. Per exempel il Hotel Steinbock a Val Sogn Pieder che sesanfla gest sper las pendicularas. Cumprar san ins era l’Ustria Cristallina a Laax che porscha medemamein loschi en diesch combras. Il Hotel e pensiun Pèz Terri a Vrin ei gia dapi in temps sin fiera e dus hotels san ins cumprar ella vischnaunca da Tujetsch, il Hotel Crestas ed il Hotel Postigliun.

La situaziun dils hotels ella Val Tujetsch fa empau quitaus al president da Sedrun Mustér Turissem, Silvio Schmid. «La midada da generaziun tier ils menaschis da famiglia ei difficila.» Silvio Schmid ha fatg persenn che la generaziun giuvna ei buca promta da s’engaschar en quella moda per in menaschi sco ils geniturs. «Per la generaziun giuvna ei la ballontscha denter lavur e temps liber impurtonta.» Ina ballontscha che Silvio Schmid vul buca mo valetar negativ. «Ins vul era haver dapli temps a disposiziun per la famiglia.» Vinavon fa el valer che las pretensiuns dils hosps seigien carschidas. «Ils giavischs e basegns individuals per exempel viers la cuschina ein gronds.»

Speronza sil resort a Dieni

Il persident dalla organisaziun turistica ei cunscients ch’igl ei buca sempel d’anflar cumpraders per in hotel. «Ins sa bein midar nez e porscher habitaziuns per exempel per emploiadas ed emploiai turistics. Sche nus havein denton negins hotels pli, sche duvrein nus era buc habitaziuns per emploiai.» Silvio Schmid tschenta perquei gronda peisa sil resort planisaus a Dieni che duei porscher igl alloschi turistic futur ella Val Tujetsch.

Alla tscherca da sligiaziuns

Il president communal da Falera, Norbert Good, deplorescha fetg ch’il La Siala siara la fin mars. Dil tuttafatg surstaus eis el buc essend ch’el enconuscha sco anteriur turisticher ils problems dils hotels turistics el sectur da treis steilas. «La vischnaunca ei involvada ella tscherca da sligiaziuns.» Norbert Good manegia ch’ins vegni da far in contract cun la proprietad da condomini dallas habitaziuns e da schar a tscheins ellas via ina plattafuorma. «Nus sperein da saver porscher silmeins 30 dallas 70 habitaziuns sin quella plattafuorma e cun quella purschida era fermir la sesiun da stad.»

Pigl auter regorda il president communal da Falera al resort planisaus all’entrada dil vitg da Falera. «Pil mument stuein nus spitgar sin la decisiun dalla dertgira en connex cun in recuors.» Norbert Good vesa certas pusseivladads da nezegiar sinergias cun il Hotel La Siala, sch’il resort sa vegnir baghegiaus. «Pil mument savein nus denton far nuot auter che spitgar sin la decisiun.» (fmr/ac)