Sin via e viadi cun Roccobello e Leon

La visiun per la Popcorn Opera seigi da crear zatgei unic, zatgei cun bia forza e zatgei inspiront, ha Bibi Vaplan getg avon dus onns alla FMR. Il december 2022 era ella intensivamein vidlunder da realisar quella visiun. Lumbrein, il liug nativ da sia mumma, ei daventaus sia basa, siu dacasa. La lavur da pervesidra ed il quitau per dus animals da casa han dau ad ella gl’equiliber – ed era inspirau la creativitad.

Ils guardians

Daferton ei la visiun «Popcorn Opera» dagitg avanzada ad in project. E quel ei ussa semtgaus per la presentaziun sin tribuna. «Igl 1 da fevrer 2025 entscheiva la turnea svizra, e quei el hotel Reine Victoria a Sogn Murezi, lu cuntinescha ella a Berna, Lucerna e Bienna», scriva Bibi Vaplan ella communicaziun ch’ella ha tarmess dacuort allas medias. Ils dus tauretgels che l’artista ha adoptau e ch’ella pervesa dapi tschun onns fan part dil project. Apparentamein van lezs denton buca sin turnea. Ins vesa els denton en videos. «Roccobello e Leon ein ils guardians d’in niev mund, digl Univers da Popcorn», haveva Bibi Vaplan getg avon dus onns. La populaziun da Lumbrein enconuscha ils dus armauls cun corns, els ein avanzai a dus accumpignaders fidai da Bibi Vaplan e siu program ambizius.

Edi Plop, nova canzun

In sempel garnin da terc daventa in popcorn. Ella cazzetta calira cun in tec ieli sloppan ils garnins, sut gl’uvierchel fa ei plopp. Ella maschina da popcorn cugl uvierchel transparent ves’ins la metamorfosa. Ed il deletg alv ei semtgaus pil scarnuz. Da quei garnin magic tracta la «historia» che Bibi Vaplan ha sviluppau.Popcorn Opera, il spitachel musical plein fantasia e ritmica tracta dalla racheta Xalvadora che parta pigl univers e pil planet dalla ventira. A bord ei la squadra che duei returnar sin tiara cull’essenza desiderada.

Per iniziar la turnea cul spitachel musical ha la musicista ed artista registrau ina canzun nova. «Igl ei in pretact explosiv per l’imminenta turnea», annunzia Bibi Vaplan. Il protagonist Edi Plop ei il garnin che schloppa e che setransforma, «el simbolisescha la forza ch’il garnin da terc drova per daventar in popcorn», explichescha l’artista, gl’Univers da Popcorn seigi naschius ord quell’essenza che detti la curascha da rumper ora e da dir vias extraordinarias.

A spass e cantond tras la Val Mulin

Bibi Vaplan conferma ch’ils dus taurs che han ussa tschun onns han inspirau ella. Roccobello e Leon cumparan per l’emprema gada en in videoclip. Duront ch’ella conta dalla forza da curascha, da rumper si, plein marveglias e libertad, cu mintga mir seigi scarpaus si e cunfins svani, va ella a spass culs dus taurs, silla via cantunala tras la Val Mulin da Lumbrein. Ella vegli buca ir anavos, mo anavon, ensi, engiu, cun forza e fermezia. Il video ed era il niev song da treis minutas che annunzia la turnea da Popcorn Opera ha il potenzial d’in hit. Sco Bibi Vaplan declara en sia communicaziun includa la producziun buca mo musica e tribuna. La show consista d’ina documentaziun televisiva, in podcast, in giug da video, in cudischs d’affons. Ils dus taurs da Lumbrein, Roccobello e Leon, ein amiez quei spitachel creativ-explosiv.