Ün impuls chantunel pel svilup turistic a S-chanf

Cur cha la Fundaziun Scaletta S-chanf vaiva organiso ün bazar cun üna part da l’inventar da l’Hotel Scaletta avaunt var duos eivnas, la manchaiva auncha ün mez milliun francs per la finanziaziun dal proget da renovaziun. Eir scha na auncha tuot ils s-chars 14,7 milliuns francs nu d’eiran auncha lo avaunt maun, vulaiva la fundaziun listess già cumanzer quista prümavaira cun las lavuors da renovaziun. «Uossa ess ura e temp chi’s cumainza, uschigliö as perda eir plaunet il schlauntsch. Que nu pudainsa – ed uossa es propi l’ultim mumaint», vaiva Mengia Mathis, commembra dal cussagl da la Fundaziun Scaletta S-chanf, dit al di dal bazar invers RTR.

Pü tard daspö quista gövgia es il schlauntsch garantieu cumplettamaing, siand cha’l proget ho survgnieu ün ulteriur sustegn. Scu cha la Regenza ho comunicho, hegia ella concedieu a la Fundaziun Scaletta S-chanf – as basand sülla Ledscha pel svilup economic – üna contribuziun chantunela dad 850 000 francs pel proget da renovaziun vast da l’hotel istoric.

Dumanda da sustegn e directivas

Ma per insomma survgnir ün tel sustegn finanziel, haun ils iniziants dal proget– in quist cas la Fundaziun Scaletta S-chanf – prüma da tuot da fer üna dumanda da promoziun al Chantun. Il Departamaint d’economia publica e fats sociels dal Grischun ho per ün tel cas – nempe per üna dumanda da sustegn per üna gestiun d’allogi – definieu directivas per pudair decider davart üna contribuziun. Uscheja as stu que tratter d’ün proget important u innovativ per l’economia regiunela e que stu gnir augmanteda la qualited da la spüerta. Impü stu gnir garantida ün’ütilisaziun adequata da l’egen chapitel e que stu esser avaunt maun üna finanziaziun fundamentela, chi’d es üsiteda sül marcho.

Il Scaletta nun es l’unic cas in Grischun

Tenor l’Uffizi per economia e turissem – chi ho respus in scrit ün pêr dumandas da la FMR in connex cun la contribuziun chantunela per gestiuns d’allogi – nu’s tratta que tar l’Hotel Scaletta da l’unic simil proget, chi’d ho survgnieu düraunt ils ultims ans üna contribuziun chantunela. Uscheja haun il proget per l’Hotel Flaz a Puntraschigna (2017), il Resort Catrina a Mustér (2018) e l’Hotel Krone a Churwalden (2020) minchün survgnieu ün sustegn chantunel dad 1 milliun francs.

«Mincha promoziun i’l sectur da l’allogi ho il böt da der impuls, d’amegldrer la spüerta, da generer nouvas pernottaziuns e da procurer per ün svilup i’l lö turistic. Que es eir il cas tal proget actuel a S-chanf», scriva Michael Caflisch, mneder svilup dal turissem tar l’Uffizi per economia e turissem.

15 000 pernottaziuns l’an

Quel svilup dess que eir der a S-chanf ed uscheja as fo que tenor la comunicaziun da la Regenza quint cha l’Hotel Scaletta renovo pudess generer var 15 000 pernottaziuns l’an. E quellas druvess S-chanf eir. Perche cha daspö cha l’Hotel Scaletta – chi’d es gnieu mno scu simpel hotel da 3 stailas cun 20 chambras – ho serro sias portas l’an 2013, mauncha a S-chanf i’l minz ün dret hotel. Sper numerus privats ed instituziuns sustegna perque eir la vschinauncha da S-chanf il proget cun üna contribuziun à fonds perdu dad 1,8 milliuns francs. Impü es gnieu do ün credit da 2,2 milliuns da la Societed svizra da credit d’hotel. Uossa es que previs cha las lavuors da renovaziun dessan cumanzer quist avrigl, uscheja cha l’Hotel Scaletta po avrir tenor plan d’utuon 2026 e que cun 36 chambras doblas u suitas da famiglia scu eir ün restorant public cun var 120 plazzas.