Glaruna – luf s’avischina ad in affon

Ei exista in video d’entginas paucas secundas digl schabetg. Sin ina spunda sur in bein puril ad Elm vesan treis dunnas dus lufs e filmeschan quels. Ins auda las vuschs dallas dunnas che discuoran dils lufs. Tuttenina grescha ina dunna: «Sebastian ei si leu! Si leu ei el!» Las dunnas greschan, il maletg ballucca, il video ei a fin. Il rest ei enconuschent da rapports da medias. In di pli tard, il venderdis vargau, decretescha il cantun da Glaruna da sittar ils dus lufs.

Il luf fui buc immediat

Sebastian ei in affon da quater onns. Ina dallas dunnas ch’ins auda el video ei sia mumma. Helen Rhyner raquinta allas medias co ch’ellas hagien griu e seigien curridas viers il luf per spuentar el. Malgrad da smanis e sbratgs seigi il luf vinavon s’avischinaus agl affon – avon ch’el seigi lura la finala fugius. In di pli tard descriva Helen Rhyner a Tele Züri il schoc en quel mument: «Quella impussonza, ch’ins sa far nuot, ch’ils lufs han gnanc pli tema da nus carstgauns, quei fa nundetg tema.» Ella contribuziun da Tele Züri ei da veser ch’il pign Sebastian ha para surmuntau senza pli gronds problems il schabetg. El termaglia puspei sin la spunda davos il bein puril – uss denton survigilaus dalla tatta.

Ils vitgs Matt, Engi ed Elm ein pertuccai

Las davosas jamnas han ins viu pliras gadas lufs en la vischinonza da vitgs ella Val Sernf, scriva il cantun da Glaruna en sia communicaziun dil venderdis. Sper Elm ein era pertuccai ils vitgs da Matt ed Engi. «Da differentas observaziuns documentadas resorta ch’ils lufs ein buca pli spuretgs visavi il carstgaun», scriva il cantun da Glaruna. Tenor il concept vertent dalla Confederaziun setracti cheu d’in «cumpurtament problematic da lufs, sche certs lufs cumparan regularmein en la vischinonza da vitgs e demussien in cumpurtament che sedrezza viers il carstgaun ni ses tgauns-casa». En tals cass astga in cantun decretar sez, senza lubientscha da la Confederaziun, da sittar ils lufs. Il decret da Glaruna vala per trenta dis. El pertucca ils dus lufs ed ei valeivels en la regiun denter Engi e la plazza d’armas da Wicheln.

Damaneivel dalla Surselva

La regiun dad Elm cunfinescha cun la Surselva, pli precis cun las vischnauncas da Flem, Laax, Glion e Breil. Il triep da lufs dil Vorab viva en quella regiun. Il settember vargau ha il cantun Grischun decidiu da regular cumplettamein quei triep. Cons lufs ch’ein effectivamein vegni sittau, ei buc enconuschent. Dalla vart da Glaruna viva il triep dil Kärpf. Da lez triep ein vegni sittai ils davos onns dus mascals che vevan scarpau plirs vadials.