Il sgrattanibels ei svanius ella nebla

L’idea presentada ils 25 da mars 2015 da Remo Stoffel e Pius Truffer a Turitg ha buca sulet fatschentau l’entira Svizra, mobein era igl exteriur. Ils dus interprendiders han presentau ils plans da realisar a Val sogn Pieder in hotel sco tuor da 380 meters altezia ed impunder per quei project 300 milliuns francs. E dasperas aunc realisar cun numerus architects dil Giapun in parc enamiez il vitg. Ils dus interprendiders da Val sogn Pieder ei in pèr gis pli tard sgulai a New York per presentar ils detagls dalla «Femme de Vals», igl sgrattaniblas alpin da cuminonza cun igl architect american Tom Mayne.

En novas dimensiuns

En novas dimensiuns han Remo Stoffel e Pius Truffer vuliu stuschar il turissem alpin. In turissem ch’il possessur dalla cava da Val sogn Pieder Pius Truffer ha valetau per morts en ina columna dalla Suedostschweiz dils 31 da mars 2015. Il rectur spirtal dalla tuor da Val sogn Pieder, aschia ha la pressa titulau Pius Truffer avon diesch onns, senta pil mument pauc gust da mirar anavos silla tuor e sil parc e daco ch’ils projects ein la finala restai sin pupi. «Vus stueis dumandar Remo Stoffel», manegia igl interprendider a Val sogn Pieder viers la FMR. El fa attent ch’autras persunas seigien oz activas el turissem ella val, aschia ch’el desisti pil mument era da valetar la situaziun turistica diesch onns suenter sia analisa.

Stefan Schmid era avon diesch onns president communal da Val sogn Pieder. Ed el ha giu da representar il pareri communal ed ils sentiments dalla populaziun viers l’idea dalla tuor dils dus interprendiders viers las medias. Gia avon diesch onns era clar che l’idea dalla tuor veva in grev stan, buca ton pervia dil pareri dalla populaziun, mobein pervia dil liug, nua che la tuor era planisada, egl intschess dalla fontauna dalla aua da Val.

Sin buna via

Oz tgamuna Stefan Schmid las pendicularas da Val sogn Pieder e meina la fatschenta dall’organisaziun turistica. E morts ei il turissem enta Val sogn Pieder tuttavia buc, sco quei ch’el sincerescha. El manegia che la publicitad generada entras l’idea dalla tuor seigi buca mo stada da disavantatg. E Stefan Schmid accentuescha las investiziuns che Remo Stoffel ha fatg el hotel 7132 Vals. «Quellas ein stadas fetg d’engrau al hotel e la finala era al turissem.» Il turissem ella val para actualmein dad esser detg vitals, era sche la vischnaunca ha giu da smaccar ina ni l’autra nusch per exempel cun finanziar las pendicularas. «Jeu manegiel che nus essan sin ina buna via», gi il meinafatschenta dalla organisaziun turistica e dallas pendicularas. «E nus vesein nossa purschida era sco part dalla purschida turistica regiunala.»

Stipular visiuns

Othmar Berni ha surpriu il presidi communal igl 1. da zercladur 2024. Relicts neu dalla tuor e dil parc planisaus cun numerus architects dil Giapun ein negins avon maun ell’administraziun communala, sco quei che Othmar Berni sincerescha. «Ils projects dil parc e dalla tuor ein stai visiuns e quellas visiuns ston interprendiders la finala sviluppar.» Il president communal ei denton sceptics ch’il plan dalla tuor e dil parc tuornan puspei. «Per nus da Val sogn Pieder ha la vendita dil bogn digl onn 2012 dau dapli da discutar e procurau per dapli emoziuns.»

Il president communal ei satisfatgs ch’igl ei reussiu da sligiar il nuv dil bogn cun realisar la fundaziun che ha surpriu il menaschi ed aschia mitigau las emoziuns. Da Remo Stoffel ha ei, silmeins entochen la fin da redacziun, era buca dau ina reacziun sin ses plans d’antruras da baghegiar ina tuor. El ha enconuschentamein midau domicil a Dubai. Sco quei che Stefan Schmid explichescha, ei Remo Stoffel duront la stad regularmein a Val Sogn Pieder. «El s’interessescha fetg per quei che cuora e passa tier nus.» Forsa eis ei per el pli sempel da realisar sgrattanibels a Dubai che a Val sogn Pieder.