Sentupada per indigens cun referat da Jon Domenic Parolini

La vischnaunca da Sumvitg envida vischinas e vischins ad ina sentupada cun cultura ed informaziuns. Hosp dalla sera ei cusseglier guvernativ Jon Domenic Parolini.

La cultura ei in impurtont bein da mintga communitad. Ella colligia e divertescha. Buc auter ei quei a Sumvitg. Per quei motiv envida la suprastonza communala convischinas e convischins ad ina sentupada en casa da scola a Sumvitg. Quella ha liug venderdis, ils 31 da schaner 2025 allas 19.30. «La sentupada pils indigens ei dedicada alla cultura», scriva la suprastonza communala el Fegl ufficial dalla Surselva. Sco hosp e referent vegn cusseglier guvernativ Jon Domenic Parolini beneventaus. El ei cau dil departament d’educaziun, cultura ed ambient dil cantun Grischun. Spel referat da Jon Domenic Parolini vegn il president communal Patrick Schaniel ad orientar davart ils projects dalla vischnaunca igl onn 2025. Enramada musicalmein vegn la sentupada cun producziuns dil Chor mischedau Sumvitg/Cumpadials. Suenter la part ufficiala envida la vischnaunca da star da cumpignia tier in apero. (fmr/hh)