Proget per ingrondir il parc da natüra vain sisti

L’idea per ün proget da ingrondir il parc da natüra regiunal e l’Unesco-Reservat da biosfera süls cumüns da Scuol e Valsot nu vain perseguitada inavant. Quai ha la Conferenza dals presidents da Regiun Engiadina Bassa/Val Müstair (EBVM) decis in occasiun da sia ultima sezzüda als 23 da favrer 2025.

Ün stüdi da realisabiltà dal 2019 sco eir ün rapport da proget da l’on 2022 vaivan evaluà l’idea e muossà cha’l proget füss insè realisabel. Ma fingià dal 2022 esa gnü decis da nu far il prossem pass, nempe dad ir illa «fasa d’ingrondimaint e da fundaziun», sco cha la EBVM scriva in üna comunicaziun. Sco cha la regiun scriva plünavant haja ün’ulteriura retschercha pro partenaris-clav muossà cha l’interess per ün ingrondimaint sül perimeter da Valsot e Scuol nun es tant grond, o cha lur prioritats sun pel mumaint sün oters progets. Uschè nun ha quist’idea neir na survgni fin uossa ün grond sustegn politic o da la populaziun. Il Parc da natüra regiunal sco eir il Unesco-Reservat da biosfera vegnan però gestiunats inavant illa fuorma existenta. (cdm/fmr)