Victour e victoura èn stos ena classa per sasez

La situaziun da partenza per la tschintgavla ediziun dallas cursas da passlung Val Surses Nordic Cup è betg stada schi optimala scu per exaimpel igl davos da schaner 2024. Lò èn las relaziuns stadas grondiousas graztga alla blera neiv e la loipa a Rona ideala. Chest onn ègl sto gist igl cuntrari cun mantger la neiv alla planeira tranter Rona ed igls Mulegns.

Scu tgi Gian-Marco Thomann, tgi appartigna agl comite d’organisaziun dall’occurrenza da passlung, ò detg, ins vegia schizont fatg ponderaziuns l’emda passada da renunztgier all’ediziun 2025 dallas cursas da passlung Val Surses Nordic Cup. «A curta vista vainsa decidia da far tuttegna las cursas, chella dalla dumengia betg a Rona, mabagn er a Savognin.», ò detg Gian-Marco Thomann. La cursa da Nordic Cross è stada planisada gio dall’antschatta davent a Savognin, a La Nars. Graztga alla neiv artifiziala seia sto pussebel da preschentar a participants e participantas tranter Savognin e Tinizong en tratg da passlung cun relaziuns regularas.

Da sonda sen dumengia ègl alloura navia, uscheia tg’è sto da far la dumang la loipa cun la maschina per ansomma saveir realisar l’occurrenza da passlung a Savognin. La consequenza è stada tgi las cursas on scumanzo pi tard, vot deir allas 11.00 anstagl allas 09.00.

Ensatge pi curt

L’atmosfera, l’ambianza è stada fitg bunga cun esser a parteir da mezde suglegl, e gioven e vigl da buna luna cun esser do finalmaintg neiv. Menziuno seia tgi l’organisaziun è stada, scu tar las davosas quatter ediziuns dallas cursas da passlung Val Surses Nordic Cup, er dumengia passada perfetga.

Igl domber da participants e participantas è sto aint igl rom digl davos onn cun 70 passlunghists e passlunghistas. Mantgea on cunzont tar la categoria principala digls omens varsaquants sportists tg’on gio gudagnea eneda la cursa u obtignia en plaz da podest. Igl tratg dalla cursa principala è sto cun 11 kilometers ensatge pi curt tgi avant en onn tar la cursa a Rona.

Ena classa per sasez

Cunter Michael Graf, igl passlunghist da Valbella, ò la concurrenza betg savia far schi bler. Igl sportist da 43 onns ò ple u manc declasso igls sies concurrents cun esser dall’antschatta dalla cursa anfignen la fegn da chella alla testa. Michael Graf totga betg angal tar egn digls miglers passlunghists da Surmeir, mabagn schizont digl Grischun. Sa participo alla cursa vegia el cunzont er per sa preparar pigl Maraton da skis engiadines (gl’onn passo è el nia 107avel), ò detg igl victour siva dalla rangaziun. Michael Graf ò domino la concurrenza ple tgi cler cun aveir alla fegn finala en avantatg da prest dus minutas segl sagond, Sascha Janutin uriund da Marmorera e sesent a Favogn. El è en polisportist ed è tar cursas da passlung regiunalas adegna puspe aint igls top diesch. Chegl vala er per Peter Niederberger da Stierva, igl president partent digl JO Nordic Surses (set onns parsoura). Eneda daple ò el fatg en plaz da podest tar ena cursa da passlung regiunala cun cumplettar tar la cursa da dumengia passada igl podest. 

Dus Surmiranas segl podest

A Carola Janutin-Dosch uriunda da Tinizong e datgesa cun sia famiglia a Favogn è reuschia da gudagner scu gl’onn passo la cursa principala dallas donnas. Er ellas on gia ena cursa cun ena distanza dad 11 kilometers. La passlunghista dall’annada 1987 ò fatg danovamaintg ena bunga cursa, tiers ena ferma concurrenza. Carola Janutin-Dosch è aint igl Grischun Central egna dallas pi fermas passlunghistas e cunzont ena sportista cun success. Dumengia passada ò ella gia cun Gabby Landolt dad Obstalden/GL, ena concurrenta tg’è da professiun scolasta da sport ed ena sportista tg’ins canoscha cunzont er da cursas da velos. La Glarunesa ò tuttegna pers ena minuta a mez sen la victoura surmirana ed obtignia alla fegn igl sagond post. Cumpletto igl podest ò cun Nina Carisch da Savognin en’ulterioura passlunghista indigena. Damai sa catta ella er bagn segls skis da passlung e betg angal segls tratgs da cursas da correr da muntogna, scu per exaimpel igl Swiss Irontrail, noua tgi Nina Carisch è davantada la stad 2024 amprema dalla categoria 53 kilometers ed igl onn avant sagonda. Igl cup (Nordic Cross e cursa principala) ò gudagnea tigls omens Peter Niederberger e tar las donnas Melanie Wieland da Nufenen.

Premi per uniuns

Ena novaziun da chella ediziun è stada la valetaziun da teams. Tar l’annunztga ò mintga participant e mintga participanta savia dar aint per tge uniun tgi el parta tar las cursas. Per mintga participant:a ègl do per cursa (Nordic Cross e distanza lunga) en punct. L‘uniun cun igls pi blers puncts ò gudagnea en bon da 500 francs digl Hotel Solaria a Beiva. Gudagnea l’occurrenza dallas uniuns ò la Scola Surses cun 19 puncts, suando dalla Musica instrumentala Salouf Mon Stierva cun 12 puncts.