Dunna tschaffada d’in auto e blessada

Il mardis endamaun ei capitau in accident cun in auto da furniziun a Breil. Ina dunna ei vegnida tschaffada da quel e blessada.

Sco quei che la Polizia cantunala dil Grischun scriva en ina communicaziun als mieds da massa, ha la dunna ella vegliadetgna da 48 onns frenau siu auto avon in hotel. Leu leva ella descargar victualias. En quei mument ei igl auto denton rullaus anavos e ha tschaffau la dunna. Tiarzas persunas han prestau igl emprem agid entochen ch’il Survetsch da salvament Surselva ei staus sil plaz. Lez ha tgirau medicinalmein la dunna e transportau ella el spital a Glion. Igl auto ei collidaus cun dus autos da persunas parcai el liug. La Polizia cantunala dil Grischun sclarescha ils motivs digl accident. (cdm/fmr)