Las turbinas da Pintrun lavuran per Trin

L’ovra hidraulica Pintrun che sesanfla sur la Ruinaulta siado ella vischinonza dalla staziun da Trin, s’auda dapi igl onn 2002 alla Axpo Hydro Surselva SA (AHS). Baghegiau l’ovra igl onn 1944 ha la fabrica da zucherisaziun da cellulosa, l’antecessura dalla Chemia da Domat. Il lag da fermada ha ina capacitad d’aua da 23000 meters cubic. La prestaziun da forza electrica munta a 29,8 uras gigawatt per onn. Suenter 80 onns ei la concessiun dalla AHS scadida la fin da november 2024. La vischnaunca da Trin ha stuiu ponderar, schebein ella vul declarar il retuorn a tschep e suprender l’ovra ni encurir in’autra sligiaziun. Tenor il president communal Maurus Caflisch ha ei suenter las pli empremas discussiuns cun il concern d’energia Axpo fatg la pareta ch’il retuorn a tschep seigi la suletta varianta per la vischnaunca da Trin.

Ponderau omisduas opziuns

Las pli empremas discussiuns denter l’Axpo e la vischnaunca da Trin pertuccont in project d’engrondir l’ovra hidraulica Pintrun han tenor il president communal Maurus Caflisch giu liug igl onn 2011. Quellas discussiuns hagien denton buca purtau fretg ed aschia seigi ins secunvegni che la AHS meini vinavon la gestiun dall’ovra Pintrun entochen che la concessiun scadi igl onn 2024. Ditg seigi la suprastonza communala lu stada dall’idea ch’ins vegni a declarar 2024 il retuorn a tschep.

Sco quei ch’il president da vischnaunca da Trin di, hagi la AHS denton fatg neginas investiziuns pli ils davos 10 onns. Ils indrezs dall’ovra Pintrun seigien perquei en in stan insufficient. «El rom dallas davosas contractivas ha l’Axpo ussa renconuschiu d’haver fatg neginas investiziuns cun in pagament unic dad 1,2 milliuns francs alla vischnaunca da Trin.»

Soluziun transitoria

«Las discussiuns denter la vischnaunca da Trin e la AHS denter 2022 e 2024 ein stadas intensivas, mo fritgeivlas», di Maurus Caflisch. «Igl ei semussau che certs puncts dispiteivels concernent il stan dad infrastructuras savessan caschunar liungas contraversas giuridicas culla Axpo, e quei alla fin finala a disfavur digl avegnir dalla ovra Pintrun.» L’Axpo, il Cantun e la vischnaunca da Trin ein vegni alla conclusiun ch’ina fuorma da partenadi fussi la megliera sligiaziun en favur digl avegnir dall’Ovra hidraulica Pintrun.

La finala ha la vischnaunca da Trin suttamess la fin da matg 2024 alla radunonza communala la damonda da fundar ina societad da partenadi cun la AHS sco concessiunaria actuala. Sco quei ch’il president communal Maurus Caflisch di en discuors cun la FMR, lubescha quei contract alla vischnaunca da ponderar ils proxims tschun onns co ei duei ir vinavon cun l’ovra hidraulica Pintrun.

Il plan concret

Sco quei che Maurus Caflisch di, duei la AHS gestiunar l’ovra electrica cun sia producziun annuala da stgars 30 uras gigawatt. La nova societad senumna Ovra electrica Pintrun SA. A questa ovra partenaria ei la vischnaunca da Trin participada cun 70%, il Cantun cun 10% e l’Axpo cun 20%. «La renunzia al retuorn a tschep indemnisescha la AHS cun ina prestaziun annuala d’entgins dieschmelli francs. Quella summa dependa dil prezzi da forz’electrica, mo lu era dils cuosts effectivs e dils recavs da Pintrun», declara Maurus Caflisch.

Vischnaunca da model

Las contractivas per la nova Ovra electrica Pintrun dalla vischnaunca da Trin cun la AHS han tenor il president communal Maurus Caflisch giu liug il medem temps ch’il cantun Grischun ha realisau sia strategia hidraulica. «Il Cantun ha secapescha era accumpignau nossas discussiuns e vesa nies model da participaziun denter la vischnaunca e la AHS sco in dils models pusseivels era per autras vischnauncas ch’ein confruntadas cun la damonda dil retuorn a tschep.» Sut il streh seigi la vischnaunca da Trin en ina situaziun favoreivla da saver luvrar el futur cun in niev contract da concessiun, e quei cun la AHS che hagi la savida tecnica e ch’enconuschi dapi decennis las infrastructruras dall’ovra Pintrun.