Plimatschs d’hotel – il tip

Adina sche jau entr en ina stanza d’hotel, guard jau l’emprim sin il plimatsch. Betg pervi da la tschigulattina da bainvegni ch’è mintgatant plazzada là. Na, mai interessescha la furma dal plimatsch. En 99 % dals cas èsi in plimatsch stagn. Tals plimatschs vesan ora grondius sin fotografias da reclama d’in hotel. Ma avais Vus era gia empruvà da durmir sin in tal ­plimatsch?

Jau n’hai nagins gens da giraffa. Mes culiez ha ina lunghezza mediocra. Perquai èsi grev da plazzar mes chau andantamain sin in tal plimatsch. Las plimas dal plimatsch paran da consister da plum e betg da derivar dad in’auca u anda.

Suenter ina notg sin in tal plimatsch dovr jau in termin tar in fisioterapeut. Suenter duas notgs stos jau ir tar la chiropraticra. Per evitar la tortura hai jau era gia empruvà da desister dal plimatsch e da durmir sin in sientamauns faudà dal bogn da l’hotel u insumma gist senza plimatsch. Ma era lez è tut auter che cumadaivel.

Vus manegiais forsa che jau dormia en hotels memia favuraivels. Na, il pretsch d’ina chombra d’hotel correlescha be en quel senn cun la consistenza dal plimatsch ch’i vala la regla: pli chara che la chombra è, pli stagn ch’il plimatsch è e pli dolurusa che la pernottaziun daventa per mes culiez e mia tatona.

Perquai hai jau ussa per disa da prender cun mai mes agen plimatsch. El sa lascha cumprimer uschè bain ch’el ha plazza en mintga valisch. La saira en l’hotel sa tschenta il fitg stagn plimatsch d’hotel lura en in chantun da la chombra e mes chau sfundra bufatg en mes agen plimatsch cun plimas lomas e tenras.