Dretgira refusa plant da Valsot

Curt è sec s’exprima la dretgira: «Il plant da la vischnanca Valsot dals 13 da fanadur 2023 vegn refusà.» La gievgia ha la Dretgira regiunala Partenz/Tavau dà enconuschent questa decisiun davart la chamona dals fragliuns Adam Quadroni e Jacqueline Mischol-Quadroni. L’emna passada ha gì lieu il process (guarda La Quotidiana dals 24 da schaner).

Ils Quadronis na ston pia betg rumir la chamona a Tramblai/S-chalambert e betg dar ora las clavs. E la vischnanca na dastga era betg trametter la polizia per rumir la chamona.

Pertge ha la Dretgira regiunala Partenz/Tavau decidì uschia? Quai n’è betg cler. In’argumentaziun manca, ina tala datti be, sch’ina partida la pretenda. La decisiun n’ha anc betg vigur legala. Las partidas pon anc appellar a la Dretgira superiura dal Grischun. Fan ellas quai?

Valsot spetga sin l’argumentaziun

Schebain Valsut tira il cas a la proxima instanza u betg n’è anc betg decidì. Sin dumonda da la FMR hai num tar l’administraziun communala da Valsot ch’ins n’haja anc betg decis co cuntinuar. «L’emprim duvrain nus l’argumentaziun en scrit da la dretgira», di il chanzlist Christian Poo. Avant na possia la suprastanza communala trair naginas conclusiuns e prender naginas decisiuns. Dapli na less il chanzlist per il mument betg dir.

Valsot ha pia gia pretendì l’argumentaziun en scrit da la dretgira. Ma daco èsi insumma vegnì a questa procedura giudiziala? Il december 2020 ha la radunanza communala decidì da prolungar per trenta onns il dretg da construcziun da trenta famiglias che possedan chamonas sin parcellas da la vischnanca.

La suprastanza communala ha lura prolungà ils contracts cun 29 famiglias, ma laschà scader il contract cun la famiglia Quadroni. Era l’inscripziun en il cudesch funsil è vegnida annullada e la vischnanca da Valsot ha pretendì dals Quadronis da rumir la chamona. Quai n’han els betg fatg.

In’interpretaziun da l’advocat

E co reageschan ils Quadronis ussa sin la decisiun da dretgira? Tiran els vinavant la chaussa? «Na, nus spetgain tge che la cuntrapartida fa», di l’advocat Angelo Schwizer. Ils Quadronis na stoppian gea betg bandunar la chamona. «E sche la vischnanca appellescha, pudain nus anc adina reagir cun in’appellaziun adesiva (tud. Anschlussberufung).»

La decisiun da la dretgira saja ina dumonda dad interpretaziun, di Angelo Schwizer: «Jau chapesch quai uschia che la dretgira parta da quella che la chamona na duai betg turnar en possess da la vischnanca, mabain duai restar tenor decisiun da la radunanza communala tar ils Quadronis. Uschiglio avess la dretgira gea stuì approvar il plant da Valsot ch’ils Quadronis ston bandunar la chamona.» Ma lura avess la vischnanca era stuì indemnisar la famiglia per la chamona.

«Sconfitta brutala che custa bler»

Plinavant na sa sentia la dretgira regiunala para betg legitimada d’inscriver en il cudesch funsil in nov dretg da construcziun per ils Quadronis, cuntinua Angelo Schwizer sia interpretaziun. Quai saja chaussa da la vischnanca.

Ina tala inscripziun en il cudesch funsil han ils Quadronis pretendì en lur cuntraplant. La dretgira l’ha refusada. Ma tgi ha uss atgnamain pers la procedura? «Per la suprastanza communala è l’entira chaussa ina sconfitta brutala che custa bler», di Angelo Schwizer. La suprastanza communala saja en il fratemp ida duas giadas adumbatten davant dretgira. «Noss cuntraplant en la segunda procedura è be stà ina reacziun sin il plant.»