Radio Alpin fa naufragi
Ussa tuttina: il Tribunal administrativ federal ha decis che Radio Alpin Grischa n’ademplescha betg las premissas da concessiun. Perquai survegn la Südostschweiz Radio SA la concessiun da radio enfin il 2034 enstagl dal duo Roger Schawinski e Stefan Bühler.
L’entschatta dal 2024 aveva l’Uffizi federal da communicaziun (UFCOM/BAKOM) surdà novas concessiuns da radio per ils onns 2025 enfin 2034. En la regiun Svizra Sidorientala ha il project Radio Alpin survegnì surprendentamain la concessiun e betg la Südostschweiz Radio SA, da lezzas uras anc cun ses Radio Südostschweiz/RSO, ussa Radio Grischa.
Cunter questa decisiun aveva la Südostschweiz Radio SA, che fa part da la Somedia, fatg recurs il favrer 2024 al Tribunal administrativ federal. Lez è ussa vegnì a la conclusiun che Radio Alpin Grischa n’ademplescha betg las premissas per survegnir la concessiun ed ils 2,8 milliuns francs per onn. Quai sa resulta da la communicaziun a las medias da la dretgira dals 30 da schaner 2025.
Ina premissa betg ademplida
La concessiun dal duo Roger Schawinski e Stefan Bühler che stat davos Radio Alpin Grischa n’adempleschia betg in’impurtanta premissa, ha il Tribunal administrativ federal constatà. Numnadamain constettia la cumpart da persunal scolà en relaziun cun persunal en scolaziun betg. Sche la cumpart da persunal qualifitgà e scolà saja memia bassa, haja quai in’influenza sin il schurnalissem da qualitad. Ord quest motiv n’avess Radio Alpin Grischa gnanc dastgà far part da la procedura da surdada da concessiun, di la dretgira en sia communicaziun davart la sentenzia. Quest criteri na possia era betg vegnir cumpensà. Cunquai cuntradi il Tribunal administrativ federal al BAKOM che aveva acceptà la candidatura da Radio Alpin Grischa. A medem temp conferma el la vista dal manader da la Somedia Silvio Lebrument, numnadamain ch’il BAKOM avess stuì excluder tenor il reglament la candidatura dals concurrents da l’entschatta (guarda box).
Nagina midada
Consequentamain na datti e na vegni a dar nagina midada. La Südostschweiz Radio SA ha gia gì enfin ussa la concessiun da radio per la Svizra Sidorientala e Glaruna. Plinavant è la sentenzia definitiva e na po betg vegnir contestada al Tribunal federal.
La finamira dals iniziants Stefan Bühler e Roger Schawinski era da rumper il monopol che la Somedia ha tenor els en la Svizra Sidorientala. La chasa da medias Somedia distribuescha gasettas, ha emetturs da radio e televisiun, sco er ina pagina d’internet. Perquai haja cunzunt il chantun Grischun pers cun quella sentenzia, sco che Stefan Bühler è s’exprimì envers la FMR (guarda box).
Da la sentenzia dal Tribunal administrativ federal ha era il BAKOM prendì enconuschientscha. La decisiun saja d’acceptar, sco ch’il directur Bernard Maissen ha ditg envers la FMR: «Nus vegnin ussa damai a surdar la concessiun per in radio privat en quella regiun a la Somedia, respectiv a la Südostschweiz Radio SA.» Tenor el haja Son Gagl simplamain «interpretà auter» il criteri da la relaziun tranter persunal scolà e persunal en scolaziun. Bernard Maissen ha declera: «En nossa valitaziun aveva Radio Alpin Grischa survegnì 0 puncts tar quel criteri. Il tribunal vesa il manco perfin sco raschun per excluder Schawinski/Bühler da la concurrenza. Quai è in’autra interpretaziun ch’ins sto acceptar.»
«Ina sentenzia irreala»
Trais dumondas davart la sentenzia dal Tribunal administrativ federal a Stefan Bühler che ha inizià ensemen cun Roger Schawinski la Radio Alpin Grischa SA.
FMR: Co avais Vus reagì sin la decisiun cunter la Radio Alpin Grischa SA?
Stefan Bühler: Igl è stà in schoc total, ina surpraisa, ina sentenzia irreala. Per nus è quai nunchapaivel. Tut ils puncts en favur da Radio Alpin Grischa èn vegnids ignorads. E be in ha il tribunal considerà. Ins ha simplamain vulì chattar insatge per impedir noss radio.
Pertge è quest punct lura uschè dispitaivel ord Vossa vista?
Il punct decisiv, la relaziun tranter persunal scolà e persunal en scolaziun, è marginal. I n’è betg ina dumonda per exempel da las finanzas. Nus avain gea ademplì tut las premissas ed era gì ina meglra candidatura. Plinavant èsi usità en ina procedura da submissiun sco en quest cas ch’ins po optimar e quai avain nus fatg e proponì al tribunal. Ma nossa proposta ed era la decleraziun dal BAKOM ch’el ans vegnia a controllar areguard il persunal n’èn betg vegnidas consideradas.
La sentenzia na pudais Vus dentant betg contestar. È quai pia la fin per Radio Alpin Grischa?
Gea, igl è stà ina sentenzia d’emprima e davosa instanza. Nus na pudain perquai far nagut pli e damai na vai uss era betg pli vinavant. Ma pers ha cunzunt il chantun Grischun. Il tribunal ha cementà cun sia decisiun il monopol e quai per adina. (fmr/vit)
«Ina surpraisa fitg positiva»
Trais dumondas davart la sentenzia dal Tribunal administrativ federal a Silvio Lebrument, il manader da la chasa da medias Somedia.
FMR: Co avais Vus reagì sin la decisiun dal Tribunal administrativ federal? Èsi stà ina surpraisa?
Silvio Lebrument: La damaun hai dà ils emprims indizis, ma tuttina èsi stà ina surpraisa fitg positiva. Perquai avain nus fatg spontan ina pitschna festa cun quai che nus avain chattà en frestgera. Ma nus essan schon era stads persvadids d’avair buns arguments.
E co valitais Vus la sentenzia che cuntradi a quella da l’UFCOM/BAKOM, l’Uffizi federal da communicaziun?
Nus avain remartgà plirs puncts en noss recurs cunter la decisiun dal BAKOM ed avessan pia anc gì inqual argument. Ma la fin finala ha in tanschì, numnadamain che las premissas n’eran betg ademplidas. E tenor las reglas dal BAKOM èsi simplamain uschia che candidaturas vegnan exclusas, sch’ellas n’adempleschan betg las premissas. Pertge ch’il BAKOM ha giuditgà quai auter, na sai jau betg.
Ed ussa vai vinavant sco usità?
Nus cuntinuain a far radio sco quai che nus al faschain dapi 37 onns. E quai plascha para a la glieud. Il davos temp avain nus numnadamain sentì enorm sustegn. Igl ha per exempel dà ina petiziun per nus che 13 000 persunas han suttascrit ed en general hai num: Faschai vinavant uschia! Ma far radio fa sa chapescha era be senn, sche la glieud al taidla. (fmr/vit)
Gust da leger dapli?