Il «workout dental»

L’emprima giada che jau hai udì da quest exercizi, hai jau stuì surrir in zichel. E scurlattar il chau. Tge ideas! – Ma suenter hai jau legì il cussegl anc pliras autras giadas en gasettinas e magazins. E lura hai jau empruvà ora mez l’exercizi, e na stoss atgnamain betg pli scurlattar il chau.

I va per in exercizi d’equiliber e trenament da forza detg banal durant lavar ils dents: star be sin ina chomma! Geabain, Vus stuais simplamain lavar ils dents cun star durant l’emprima mesadad da lavar ils dents sin la chomma sanestra e lura durant la segunda mesadad sin quella dretga. Quai tuna plitost absurd e vesa ora detg comic, ma quel exercizi è da chattar en numerus cudeschets e cussegliaders medicinals.

Ed a tge serva quai? – Tut simpel: Cun quella «tecnica da lavar dents» vegnan trenads la coordinaziun e l’equiliber dal corp, schegea en ina furma modesta. Ultra da quai vegn era trenada la musculatura en las chommas. Surtut en la vegliadetgna, cura che l’equiliber n’è betg pli uschè bun, po il trenament apparentamain far miraclas.

Tgi che pensa che quai saja gea in exercizi plitost simpelet, quel u quella po patgific auzar il livel, per exempel cun prender in barschun normal e betg in electric, cun serrar ils egls durant lavar ils dents, cun star sin la detta dals pes, cun muventar las chommas etc.

Vus as dumandais ussa forsa, sche jau fatsch vairamain quel exercizi mintga damaun u mintga saira durant lavar ils dents? – Lain dir uschia en il jargon da fitness: mes «workout dental» ha anc potenzial!