In milliun per 80 meters

Reconstruir la via sbuada ils 28 da fenadur 2025 ella Val Sumvitg cuosta datier dad in milliun francs. Sco quei che la vischnaunca da Sumvitg scriva en ina communicaziun, quenta ella ch’il Cantun surprendi 50 entochen 60 % dils cuosts.

A caschun dad ina uatga sil plazzal ella Val Sumvitg ha il president communal da Sumvitg, Patrick Schaniel, numnau plirs motivs che caschunan ils aults cuosts per reconstruir la via ad Acla Mulin: «Il plazzal sesanfla en in liug fetg spundiv.» El ha fatg attent che la plaunca sur la via seigi entras il sbuau daventada instabila e seigi perquei vegnida cavada giu. Il president communal ha getg ch’ei seigi era buca pusseivel da remplazzar sulet il tschancun dil vial sbuau. «En tut stuein nus remplazzar biabien 80 meters dalla via.» Patrick Schaniel conceda che 950 000 francs seigi era ina aulta summa per 80 meters via. «Acla Mulin sesanfla denton buc el plaun da Surrein e nus vulein ina sligiaziun che tegn e che caschuna buca novs problems gia en in pèr onns.» 

Serrada tochen la fin november

Sco quei che Partick Schaniel ha declarau, resta la via dalla Val Sumvitg naven dad Acla ­Mulin serrada per tut il traffic e quei entochen che la via ei reconstruida. Per il traffic buca motorisau existan alternativas dad untgir il plazzal via la punt pendenta e la via veglia tras la val. Il president communal quenta che l’interpresa possi terminar sia lavur l’entschatta november. «Sche las lavurs san vegnir exequidas tenor plan, ei la via puspei libra naven dall’entschatta december.»

El liug han ils luvrers gest francau ina reit da segirtad silla scarpa per proteger ella dalla erosiun e per segirar la via da curdada da crappa. Ils fundaments per ils novs pilasters dalla punt ein en construcziun e l’interpresa da baghegiar ha era francau ancras el grep per la nova punt e per segirar il plazzal. Secapescha ch’ils cuosts per reconstruir la via sbuada ein buca stai prevesibels. Patrick Schaniel ha getg ch’el vegni a presentar la damonda per in credit posteriur per la reconstrucziun dalla via a caschun dad ina proxima radunonza communala probabel il december 2025.

Procura publica interquera

Per dapli discussiun che la sbuada, ha la siglientada dallas restonzas dalla via donnegiada procurau. Ina interpresa da construcziun ei stada incaricada da siglientar ils 12 d’uost 2025 il vial da betun ed ils mirs da crappa dalla via donnegiada ad Acla Mulin. Ina siglientada ch’ei buca succedida tenor giavisch: Tocca da betun dil vial ha donnegiau autos parcai ella vischinonza e tetgs da tegias e clavaus.

Sco quei ch’il president communal da Sumvitg, Patrick Schaniel, ha fatg attent ei l’interpresa responsabla per la siglientada e sias consequenzas. «Nus havein surdau ad ella l’incarica da siglientar e l’interpresa ha exequiu la lavur tenor sias enconuschientschas.» Per Patrick Schaniel eis ei indiscutabel che las restonzas dalla siglientada che schain aunc ella val ston vegnir allontanadas. «Per part ei quei gia succediu e per part vegnan las restonzas allontanadas cun il material dalla spunda che sesanfla actualmein ella val.»

Co reparter ils cuosts d’allontanar il material che sesanfla aunc ella val, vegn la vischnaunca aunc a sclarir en detagl cun l’interpresa involvada, sco quei ch’il president communal gi. La Procura publica federala ha confirmau sin damonda dalla FMR ch’ella hagi instradau ina procedura viers ina persuna, denter auter pervia d’in suspect da haver cunterfatg alla lescha davart materials explosivs e caschunau perquei donns materials. La procura renda attent alla presumziun d’innocenza per tut las persunas involvadas.