Chel da Tinizong

«Tgeee, te ast anc igl pignoul da Nadal? Igl noss vainsa gio dusto da dei ainten la scatla.»

«Nous vagn er mess davent igl pignoul, avant Son Silvester.»

«Mamma ò detg tg’igl noss fetscha neir tschuf igl tarpung», chegl or dad ena terza bucca d’en steiler tg’è nia a tschanar da Buneia. 

Cun smarvegl on igls unfants da Cunter remartgea tg’igl mies pignoul stetta anc adegna an plagna parada tar nous ainten steiva.

Ea, sapientivamaintg deia ‹igl mies›. Numnadamaintg siva digls 6 da schaner stat chel pignoul sot la protecziun speziala da me. Igls oters onns, va er ia adegna dusto igl pignoul anturn igls deis da Buneia. Pero chest onn ègl oter.

Sonda avant Nadal igl vaia tscharnia davant igl luvratori forestal a Tinizong. Ia va adegna las mademas preteisas anvers igl pignoul da Nadal. El sto saveir discorrer rumantsch, per me ena descripziun tg’el stoptga esser indigen. Via e tscharnia. Ed ossa vaia egn da Tinizong, el seia carschia manevel digl Vitaparcours, ònigl detg. Pas mal, chest onn betg angal egn tgi discorra rumantsch, mabagn er egn da chels sportivs. Ossa è chel amploster gio daple tgi curanta deis tar nous an steiva, e scu tgi para igl plaigl ordvart bagn. El risguarda la regla dalla reglas, ed uscheia cozza la sia viseta a Cunter emda per emda pi dei.

La regla dallas reglas è simpla: Schi dei tg’igl pignoul perda betg las guglias, schi dei pò el restar. Am è gio paria curious da Son Stefan tg’ia va catto mianc ena singula guglia sot igl pignoul, anc adegna betg da Son Silvester ed er betg anc da Buneia. E perchegl pò chel da Tinizong anc star an steiva.

Er schi chel da Tinizong ò betg anc angal admiratours ainten steiva. Va er gio miro cun la pantofla sen chel tgi leva trer or cun violenza ena guglia agl mies pignoul, e tschel de ò l’oter bagn gia l’impertinenza da dumandar, schi fiss betg forsa ouras da piglier giu la culas da Nadal. Scu sa santiss er chel pover pignoul, cun eneda blot blotitsch ainten steiva, tranter gliout estra. A, na, tot amblido. Esters ischans betg ple, nous abitagn gio daple tgi curanta deis ansemen. Pero da piglier giu la culas vign tuttegna betg an dumonda, chel pover toc niss cotschen digl turpetg e pardess alloura tot las guglias an eneda.

An mintga cass, chel da Tinizong canoscha la regla per pudeir restar. E schi vot esser, catta er glioirs da Pasca per pender ve digl pignoul.

Zegna Pittet-Dosch è scolasta e viva cun sia famiglia – e cun in pignol da Nadal – a Cunter.