Nigna sorteida a Crans-Montana

Igl davos meis è Crans-Montana, igl li turistic aint igl cantun Valleis, sto permanent aint igl focus digls meds da massa. Chegl siva digl incendi tragic da Son Silvester sen Bumang ainten ena discoteca. La davosa fegn d’emda è igl li turistic da renom er sto aint igl focus internaziunal e chegl perveia dallas cursas da skis dalla coppa mundiala dallas donnas e digls omens. Igl on proxim on li aint igl meis da favrer a Crans-Montana igls campiunadis mundials da ski alpin. Sonda e dumengia è schi lagn deir uscheia stada cun las dus cursas aval dallas donnas e digls omens la prova generala per la gronda occurrenza digl 2027 aint igl meis da favrer.

Schi manevel agls stars da skis

La raschung tgi igls radond 180 suldos on passanto la gronda part digl curs da repetiziun da treis emdas a Crans-Montana èn stadas las cursas da skis dalla coppa mundiala. Igl è uscheia tgi l’armada svizra è adegna preschainta avant las cursas, durant las cursas e siva dallas cursas per sustigneir an plessas modas igls organisatours ed er la Federaziun internaziunala da skis (FIS). Stos fatschentos èn igls suldos cun la montascha dalla reit per lung dalla pista dalla cursa, schizont cun spalar neiv, stumplar or la neiv nova or dalla pista preparada ed er cun lavours da glischnier la pista.

An acziun è igl militer cun 20 suldos grischuns er sto cun sustigneir la televisiun svizra SRF cun montar da tottas sorts cabels. Laurin Luzio è sto fatschento cun lavours aint igl arreiv dallas cursas. Igl suldo da Savognin tg’ò fatg igl sies tschintgavel curs da repetiziun dei: «Scu suldo vaia gia dapertot access aint igl final ed er aint igl conturn da chel.» D’antupar igls stars da skis scu Marco Odermatt ed er Franjo von Allmen seia sto ena veira culminaziun digl curs da repetiziun. Tots dus seian er dalunga stos pronts da far en selfie. Varsaquants pleds vegian els er discurria e ludo la lavour digl militer.

Angal ainten la caserna

Laurin Luzio dei tgi tranter igls suldos seia igl incendi da Crans-Montana strousch sto en tema. Er tranter igls blers fans da skis vegia el gia l’impressiun tgi niva betg discurria schi bler da chel fatg tragic. Tgi aint igl li sez pendan blers vels da malancurada, chegl sei dalunga do an îgl. L’ambianza aint igl li turistic seia bagn stada en po pi discreta ed a festas seia pitost nia renunztgia. Adegna puspe ins vegia vasia gruppas tgi sa regurdavan allas persungas tg’on pers lour veta antras igl incendi e chella realitad seia tuttegna stada impressiunonta. Laurin Luzio ò menziuno: «A Crans-Montana era betg lubia d’eir an sorteida, chegl er per mussar en tschert respect anvers igl incendi tragic e tot las persungas pertutgeidas da chel.» Chel scumond vegian tots igls suldos accepto ed er sa tignia vedlonder, dei igl cumpogn da Savognin. Staziuno era igl battagliun ainten la caserna da Lens, en li 6 kilometers lontan da Crans-Montana. Sapientivamaintg era igl areal da sorteida angal ainten la caserna, chegl er per evitar pi grondas festas tranter la suldada.