Il Lido occupa la glieud

«La situaziun da partenza è buna, ma la concurrenza na dorma betg», ha Maurin Malär ditg mesemna a la saira d’infurmaziun davart il Lido da Lai. Questa zona a la riva dal Heidsee duai vegnir sanada per radund 5,6 milliuns francs – tenor il president communal da Vaz ina investiziun necessaria per restar attractiv e per mantegnair il bainstar da la vischnanca.

A Zorten en la chasa da scola ha quest project dentant procurà per inqual dumonda e quai malgrà ch’ins è da princip perina ch’il Lido saja memia pitschen e basegnia ina sanaziun. Che la schliaziun preschentada occupa talmain la glieud, quai n’è dentant stà nagina surpraisa per il president communal. «Il Lido è in lieu fitg popular. A la populaziun èsi enorm impurtant ch’i dettia insatge bel», ha Maurin Malär ditg suenter la saira d’infurmaziun envers la FMR. Ina prognosa en vista da la votaziun a l’urna dals 8 da mars 2026 n’ha el damai betg vulì far. I saja grev da dir, sche la populaziun stettia davos il project che la suprastanza ed er il parlament communal sustegnan.

In nov bajetg cun dapli spazi

Da discutar ha per exempel dà la dumonda dal spazi. Il nov bajetg en furma d’in mez rudè cumpiglia in restaurant che porscha plazza per radund 50 persunas. Quai saja memia bler, ha in dals var 20 participants e participantas da la saira d’infurmaziun ditg. Cun reducir u perfin stritgar quest spazi pudessan ins spargnar tar ils custs da construcziun e gestiun.

Sco che l’architect Ivano Iseppi ha explitgà, saja il potenzial da spargn dentant modest. Ins stoppia tuttina construir ils locals sanitars, la cuschina ed il magasin. E sco che Maurin Malär ha ditg, na saja il spazi dal restaurant betg mo uschè generus per tegnair quint dal dumber da giasts creschent: «Il Lido po uschia er esser in lieu attractiv per occurrenzas, saja quai alura publicas u privatas sco tschainas da fatschentas.» E per ademplir ils basegns dals giasts durant l’enviern saja tuttina bun d’avair in spazi per star a chaud.

Dal reminent duai il restaurant dal Lido restar quai ch’el è er uss, in local per in e scadin senza servetsch a maisa – uschia il president communal.

Dapli spazi per star a sulegl

Il nov Lido duai plinavant era porscher dapli spazi dadora per star a sulegl ed uschia daventar pli attractiv. «Grazia al nov concept cun ina terrassa sin il tetg dal bajetg datti dapli spazi per giaschair», ha il manader da construcziun da la vischnanca Walter Büchi explitgà. Ma era quai ha dà discutar. «Igl è in bel project. Ma igl è era da guardar ch’i n’attiria betg memia blers giasts. Il Lido na duai betg daventar in pitschen Venezia», uschia in dals resuns.

En quest connex ha Maurin Malär dentant punctuà ch’i na saja nagina schliaziun luxuriusa: «Il Lido duai da princip restar quai ch’el è, numnadamain in lieu per famiglias, per indigens e per giasts.» Ins saja damai era sa decidì cunter far pajar entrada en l’avegnir.

Ulteriuras dumondas hai en pli dà en connex cun la situaziun da velos e la furniziun. I na saja dentant betg da quintar cun bler traffic, damai ch’il magasin saja relativamain grond, han ils responsabels fatg a savair. E sco ch’els han explitgà, hajan ins planisà parcadis per velos e ch’il Lido vegnia percepì sco in areal per peduns.

Anc nagin termin

Cura ch’il nov Lido vegniss bajegià en cas dad in GEA a l’urna, quai n’è entant anc betg cler. «La finamira è da realisar quest project parallelamain cun la sanaziun dal rempar dal Heidsee. Uschia dessi be ina giada in plazzal», ha Maurin Malär ditg. Cunquai che la sanaziun dal rempar s’entarda pervia da novas directivas da l’Uffizi federal d’energia, na vegn probablamain er il Lido betg realisà quest onn. Ins na veglia dentant betg spustar quest project memia ditg. «Sch’il rempar po pir vegnir sanà en intgins onns, realisain nus il Lido independentamain», uschia il president communal.

E sch’il suveran refusescha il nov Lido a l’urna, lura stoppian ins reponderar l’intent, vul dir surlavurar il project actual u proponer in nov. Cler è en mintga cas ch’il Heidsee vegn era vinavant ad esser tema. La sanaziun dal rempar ed il Lido èn numnadamain be singuls projects dal «Masterplan Heidsee».