Lectura Rumantscha

Opposiziun a Surcuolm

A mintgin ses gust, di il giat litgond ses tgil. Gea, dals gusts n’èsi betg da dispitar, almain sch’i va per chaussas banalas sco moda e spaisa. Cura ch’i va per rauba pli relevanta sco in project da construir 60 novas abitaziuns amez il vitget da Surcuolm, lura è quai in pau auter. Lura èsi da prender il det or dal tgil – per restar tar ils maletgs pli vulgars – e prender posiziun. E quai ha apunta ina gruppa da resistenza fatg. Il project planisà a Surcuolm saja surdimensiunà, tenor il gust dad Irene Schneider.

Anniversari da Surses

Tge che dura ditg, madira bain. Quai che vala per buns vins, bunas padellas e buns chaschiels, quai na vala anc betg per la vischnanca Surses. Quella festivescha quest onn ses 10avel anniversari dapi la fusiun. Ina festa giubilara na datti dentant betg. Per quai n’è la vischnanca forsa anc betg madira avunda. Il president communal admetta en mintga cas: «Il spiert communal per l’entira vischnanca n’è anc betg sviluppà fitg.» En il Surses dovri en quest grà damai anc in pau pazienza.

Nagina motivaziun a Scuol

Ils Pumpiers Pisoc a Scuol han in corp imposant. Radund 110 commembras e commembers dumbra quel actualmain. Ma l’apparientscha po cugliunar in pau: Malgrà il fundament corpulent èsi tar il cader plitost magher, sco ch’il cumandant Hans Andersag ha ditg envers la FMR. I manchia simplamain la motivaziun d’impunder dapli temp per il servetsch da pumpiers.

A revair e bun divertiment cun la Lectura Rumantscha!