Lectura Rumantscha

Era dus dis suenter las votaziuns da la dumengia restan quellas tema en la Lectura Rumantscha. Igl emprim dentant anc en Val Müstair resp. per tut il mund enturn ed ad Andeer.

Mas-chalch va digital?

A New York, en l’Italia, en la Frantscha, en l’Austria e natiralmain en Val Müstair – il Mas-chalch vegn legì en blers lieus. La vischnanca da Val Müstair infurmescha cun sia gasettina mensila ses abunents ed abunentas davart fatgs politics, socials ed economics da la Val. Malgrà l’internaziunalitad tschessan però ils abunaments. E quai ha consequenzas: u ch’igl abunament vegn pli chars u il Mas-chalch digital.

Charrar senza sustegn celestial

Avant prest nov onns han ils d’architects da renum Herzog & de Meuron preschentà lur project d’ina baselgia d’autostrada. Auter ch’ina attrappa sper l’autostrada ad Andeer che deva illustrar las dimensiun da la baselgia n’era anc da vesair nagut concret. Ils daners mancan e recurs impedeschan il project, uschia ch’ils automobilists ed automobilistas da la A13 ston vinavant charrar senza sustegn celestial.

​Nivels davant la halla per trid’aura

Il president communal da Mustér René Epp ha gì la dumengia da votaziun plaschair dal votum da la populaziun – in cler GEA per ina nova halla per sa divertir da trid’aura. Nivels èn dentant sa furmads davant quel cler GEA: Igl ha dà in recurs concernent il dretg da votar. Il project da votaziun cuntrafetschia als principis da l’unitad da la materia, ha declerà il recurrent.

In di da sulegl suenter la votaziun

Il cusseglier naziunal Martin Candinas guarda in di suenter la votaziun davart l’Iniziativa SSR enavos sin sia campagna per in NA. L’aura sulegliva a Berna durant l’intervista resplenda era sia luna ed el di: «Insacura èsi era bun cun quellas votaziuns davart la SRG SSR.»

A revair e bun divertiment cun la Lectura Rumantscha!