«Igl n’è betg ina decisiun cunter RTR»
Il directur actual Nicolas Pernet banduna la chasa da medias rumantscha RTR. A partir da l’emprim d’avrigl 2026 midà el en la nova direcziun da la SRG SSR e surprenda là la direcziun dal nov sectur «Purschida». Per RTR cumenza la tschertga d’in successur u d’ina successura.
Mesemna suentermezdi èn ils trais novs «chaus» da la direcziun da la SRG SSR sa preschentads a las medias a Berna. Tranter els era il Rumantsch ed actual directur da RTR Nicolas Pernet (46). A partir d’avrigl vegn el a manar la nov-stgaffida partiziun naziunala «Purschida». Tar questa partiziun tutgan per exempel ils secturs ficziun, sport, la plattafurma da streaming Play+ e lura anc autras sutpartiziuns sco datas, intelligenza artifiziala, Swissinfo e retschertgas dal martgà. La consequenza: RTR sto ussa tschertgar in nov directur u ina nova directura.
FMR: Vus essas dapi il 2021 directur da RTR. Ussa midais Vus en la direcziun SRG SSR e daventais directur «Purschida». Avais Vus gia ademplì Voss pensum tar RTR?
Nicolas Pernet: Quai è ina buna dumonda (ri). Jau crai, en las medias sco martgà fitg dinamic na vegns ti mai a fin. Qua stos ti permanentamain ta transfurmar. Jau crai dentant era che tschintg enfin set onns saja in bun temp per in directur – quai dat puspè la schanza per in refrestg.
Vus avevas in dals «top-jobs» en la Rumantschia e tuttina – daco avais Vus decidì dad ir?
Mia decisiun n’era betg ina decisiun cunter RTR. Jau fiss anc gugent e cun premura pli ditg directur da RTR ed hai fatg zunt gugent quest pensum. Ma tranteren datti era novas schanzas nua ch’ins sto decider, sch’ins s’annunzia per ina plazza u betg. A las collavuraturas ed als collavuraturs hai jau era ditg cleramain ch’i saja ina decisiun per il nov – e betg cunter RTR.
Vus midais damai en ina funcziun naziunala. Pon ins interpretar quai sco «sigl da carriera»?
Quai dependa co che Vus definis quai. Tut quai che jau fatsch, fatsch jau adina or dad ina spira emoziun ed or da plaschair. Ed ina motivaziun è segir che jau hai gust da bajegiar si insatge nov cun questa partiziun «Purschida». Per il solit tar in post surprendan ins ina tscherta structura tar il cumenzament dad in job, ma qua hai jau la schanza da fabritgar si insatge cumplettamain nov. Ed uschè ina pussaivladad han ins darar ina giada en la vita professiunala. Siglir ensi u ennà, quai è ina chaussa d’interpretaziun e betg impurtant per mai.
Vus midais «per immediat» – vul dir a partir d’avrigl stat RTR qua senza directur ed ina squadra interimistica vegn a manar la bartga. Cura han las discussiuns pervia d’ina midada cumenzà?
Quai è stà in process che ha durà ditg. Noss focus è durant ils davos mais stà ferm sin la votaziun da la dumengia, nua che nus avain cumbattì l’iniziativa «200 francs bastan». Suenter che quai era passà, avain nus communitgà las midadas internas.
Bundant tschintg onns essas Vus stads directur. Da tge experientschas tar la chasa da medias rumantscha pudais Vus profitar era en la nova funcziun?
Detg bler. Jau crai, RTR è istoricamain fitg datiers dal public en nossa regiun ed ha ina rolla fitg ferma en la Rumantschia. Da questa experientscha sai jau era en il nov job profitar ferm. Tge che jau hai era emprendì: Relevanza n’ha da far nagut cun grondezza. Quai mussa RTR mintga di da nov.
Il pli grond success?
Jau crai, in grond success è segir il cumbat cunter l’iniziativa da smesar il budget che nus avain gudagnà l’ultima dumengia. Lura avain nus surlavurà la strategia da RTR e cuntinuadamain digitalisà e transformà la firma. Jau crai, RTR è oz tar in auter punct. E sin quai pudain nus esser loschs.
Sper il job da directur avais Vus gea era manà il program da spargn cun il num rumantsch «Enavant». Quel prevesa mesiras da spargn ils proxims onns da bundant 300 milliuns francs. Cun tge sentiment avais Vus fatg quella lavur?
Quai è schon stada ina gronda sfida, cunquai ch’igl era in relativamain grond program cun bleras gruppas da lavur involvidas. E da far quella lavur anc sper la lavur sco directur da RTR n’è betg adina stà simpel. Dad ina vart esser preschent tar RTR e s’engaschar, ma da tschella vart era anc cuntentar quest impurtant program da transfurmaziun, quai era in spagat. E mintgatant è quai gartegià meglier e mintgatant mender. E tschella sfida è natiralmain las differentas rollas: Dad ina vart integrar e sa fa ferm per ils interess dal rumantsch e da tschella vart avair ina tscherta objectivitad tar «Enavant».
Vegn la posiziun da RTR entaifer quest program da spargn lura ussa flaivlentada, sche la chasa da medias rumantscha stat qua senza directur?
Na, absolutamain betg. Ins na dastga betg emblidar: Igl n’è betg mo il directur sulet che lavura ed ha la perspectiva da RTR, quai èn bleras collavuraturas e collavuraturs ch’èn engaschads entaifer quel program. Jau crai era ch’il team da RTR che surpiglia ussa ad interim enfin ch’ins ha chattà in directur u ina directura, che quels fetschian quai extraordinariamain! Qua poss jau ir cun in bun sentiment: Jau sai che RTR è in buns mauns.
Gust da leger dapli?