«Sanar cuosta dapli che baghegiar da niev»

La «casa da scola nova», sco il baghetg da scola construius 1980 vegn numnaus a Mustér, basegna ina sanaziun. Da quei ein las autoritads pertschartas dapi onns. Las enconuschientschas fatgas ussa cun in studi davart il potenzial digl entir areal da scola, sco era in concept co proceder en quei connex muossan en tgei direcziun ch’il project savess ir. Gliendisdis, ils 23 da mars 2026 vegn il cussegl da vischnaunca orientaus davart il project. Il medem mument damonda la suprastonza communala il parlament per in credit da 380 000 francs per arranschar ina concurrenza da project culla finamira da construir in niev baghetg per la scola populara a Cons. El duei remplazzar la casa da scola erigida 1980.

Ina nova casa da scola

Tenor quellas empremas ponderaziuns duess la «casa da scola nova» lu vegnir spazzada. Sch’ei va tenor la veglia dalla suprastonza communala duess quella fasa da planisaziun sesplegar ton pli spert, aschia ch’il suveran havess da decider igl emprem quartal 2028 davart il credit da baghegiar. Las lavurs da construcziun pudessen entscheiver sil pli baul igl onn 2029. Tenor empremas enconuschientschas duessen ils cuosts pil baghetg niev e silsuenter cun spazzar la casa da scola baghegiada 1980 semover denter 12 e 15 milliuns francs. Ina secund’etappa savess la sanaziun dalla casa da scola veglia esser. Per quella vegn calculau il mument cun cuosts da quater milliuns francs.

Analisau igl areal

Per saver giudicar co agir futuramein culs baghetgs, respectivamein culs basegns dalla scola populara sigl areal a Cons, ha la suprastonza communala schau elavurar in studi. Quel ei vegnius exequius dil biro d’architectura Tambornino. «Quei studi dat a nus ina buna basa e sin fundament da quel havein nus schau elavurar in concept co proceder. Quel ei vegnius fatgs dil biro Stauffer & Staudach SA. Quei biro ha cussegliau nus gia ella strategia pertuccont il Center Fontauna», di il meinafatschenta dalla vischnaunca da Mustér, Roland Cajacob. Il studi che circumscriva plirs projects parzials sigl areal a Cons vegn alla conclusiun che la casa da scola veglia, construida 1952, ha ina buna substanzia e sa vegnir nezegiada vinavon en quella fuorma. Perencunter sepresenta in auter maletg tier la casa da scola baghegiada 1980. «La sanaziun da quella vegn ad esser cumplicada e custeivla. Plinavon eis ei fetg grev da planisar ina sanaziun, damai ch’igl ei grev d’eruir tgei che spetga ellas differentas localitads e davos las preits», scriva la suprastonza communala el messadi per mauns dil cussegl da vischnaunca. In problem savess per exempel la materia d’asbest esser.

Sanaziun fetg custeivla

La suprastonza communala constatescha ch’ils cuosts per ina sanaziun dalla «casa da scola nova» fussen pli aults che da construir in baghetg niev. «La sanaziun sco tala ei denton mo ina caussa. Il medem mument havein nus l’obligaziun da procurar per in’infrastructura adattada era per persunas cun handicap. Plinavon vegnin nus confruntai cullas pretensiuns pertuccont in cass da tiaratriembel», di Roland Cajacob. Leutier havess in baghetg niev igl avantatg che las localitads dalla casa da scola savessen vegnir nezegiadas entochen ch’il baghetg niev fuss realisaus. «Aschia stuessen nus buca procurar per in provisori», puntuescha Roland Cajacob. Nua exact ch’il baghetg niev duess vegnir erigius sin plaz scola a Cons vegn surschau alla fantasia dil planisader che gudogna la concurrenza da project.

Concept cumplessiv

Il studi che la vischnaunca ha schau elavurar davart igl areal da scola a Cons seconcentrescha buca spirontamein sils basegns dalla scola populara. En quel vegnan in tschuppel opziuns, variantas e pusseivladads tematisadas. El cuntegn era ulteriurs aspects sco per exempel il spazi per la canorta d’affons, la biblioteca, la ludoteca ed in caffé ni mensa. In’ulteriura opziun, probabel pauc realistica, fuss ina garascha sutterrana sigl areal. Sin fundament dil studi e dil concept constatescha la suprastonza communala: «Igl areal da scola ha il potenzial da daventar in liug da sentupada unic.»

Definir ils criteris

Duess il cussegl da vischnaunca conceder il credit da planisaziun vegnessen ils criteris per la concurrenza da project fixai ladinamein. «La basa per la concurrenza da project cuntegn surtut il perimeter pusseivel per ina surbaghegiada, il program da localitads, la rama da cuosts e las cundiziuns da rama», scriva la suprastonza communala. Il program da localitads vegness elaboraus d’ina gruppa da lavur che duess consister da representants dil scolaresser e dalla vischnaunca.