Spindrament dramatic a Breil

Il fried da fem ei aunc bein presents la gievgia vargada el vitg da Breil suenter igl incendi dalla mesjamna suentermiezgi. In’egliada el liug tradescha che la casa dad ina famiglia ei donnegiada bunamein cumplet e ch’il clavau annex ha pitiu donn dallas flommas. Sco quei che la Polizia cantunala scriva en ina communicaziun derasada la gievgia vargada ha il possessur dalla casa, in um da 79 onns, buca saviu fugir ord atgna forza dallas flommas. In passant che ha udiu il clom d’agid ha gidau igl um d’untgir da finiastra ora. Sin fundament dallas grevas blessuras ha la Rega sgulau igl um el Spital dalla universitad da Turitg. In auter vischin che ha vuliu cumbatter il fiug ed il spindrader digl um da 79 onns ein vegni transportai cun l’ambulanza el spital a Glion pervia da suspects da tissientada da fem, scriva la polizia. Als pumpiers eis ei reussiu dad impedir che las flommas ein sederasadas sin divers baghetgs che sesanflan ella vischinonza. Denton buca mo igl incendi sco tal dat da discutar in gi pli tard ella vischnaunca da Breil.

Ina fallida novitad

Sco quei ch’igl ei oz usit sederasan films e fotografias da talas disgrazias ella reit bunamein aschi spert sco las flommas e contonschan aschia era las redacziuns da radio e gasetta. E cun ellas era informaziuns che sebasan sin aschinumnau rapports da lecturs. E sin in tal rapport ei l’ediziun online dalla Südostschweiz sereferida cun sia novitad ch’ils pumpiers dalla vischnaunca da Breil hagien duvrau 40 minutas entochen ch’els hagien giu aua a disposiziun per stizzar il fiug. Ina novitad ch’il cumandant dils pumpiers da Breil, Maik Defuns renviescha categoricamein. «Quei ei ina novitad che constat buc. Sche nus havessen duvrau 40 minutas per entscheiver a stizzar, fuss buc mo ina casa stada pertuccada dallas flommas.» Detagls dalla acziun dils pumpiers da Breil vul el denton buca tradir e fa attent al post da communicaziun dalla Polizia cantunala. Markus Walser, il pledader da medias dalla Polizia cantunala sustegn la valetaziun dil cumandant dils pumpiers da Breil. «Nus savein cumprovar ch’ils pumpiers eran gia en cumpleina acziun da stizzar 15 minutas suenter igl alarm.»

Alarmau igl entir corps

El deplorescha che las medias selain magari sin rapports da tiarzas persunas senza verificar las novitads. «Quei ei buca dil tuttafatg serius.» Conradin Caduff, il schef dils pumpiers grischuns conceda ch’igl alarm digl incendi da Breil seigi vegnius mesjamna in pèr minutas suenter las 16.00. Sco emprem ei la gruppa d’emprema intervenziun vegnida alarmada. En vesta dalla grondezia digl incendi ha il meinacziun immediatamein alarmau igl entir corps da pumpiers dalla vischnaunca da Breil e cuort suenter igl autoscala dils pumpiers da Flem. «Per in corp da pumpiers da milissa ein las 10-15 minutas digl emprem alarm entochen ch’ils pumpiers ein en cumpleina acziun fetg bien», gi Conradin Caduff. La prioritad ha adina il spindrament da persunas ed animals en prighel, avon la lavur da stizzar.

Alarmar el dretg liug

Conradin Caduff ei cunscients dil fenomen dad ozilgi da filmar e fotografar mintga incendi. «Igl ei impurtont ch’ins tralaschia buca d’alarmar ils pumpiers via la numera 118 enstagl da seconcentrar sin filmar e fotografar.» Igl ei clar ch’ils pumpiers san semetter sin via pér el mument ch’els vegnan alarmai. «Tier incendis evidents ni d’ina certa grondezia vegn en regla alarmau spert.» Conradin Caduff ha denton gia fatg stem ch’ins vul buc alarmar ils pumpiers memia baul tier incendis pli pigns, ni aschinumnadas bagatellas «Biars han tema ch’els stoppien en quei cass forsa surprender ils cuosts dall’intervenziun.» Quei ei denton buc il cass sco quei che Conradin Caduff sincerescha. «Negin sto surprender ils cuosts per alarmar ils pumpiers sch’el fa buca quei semplamein per maldiever.» Magari telefoneschan persunas che fan stem dad in incendi buca direct a la numera 118 ed emprovan enstagl das contonscher il cumandant dils pumpiers ni ch’els telefoneschan sin canzlia ni ad enzatgi auter. Auters emprovan sezs da stizzar il fiug avon ch’ alarmar. En tals cass sa dabia temps decisiv ir a piarder entochen ch’igl alarm contonscha ils pumpiers. Conradin Caduff fa attent allas recumandaziuns ch’ils pumpiers dattan alla populaziun. Sisum quella gliesta stat l’emprema clara directiva, alarmar ils pumpiers sur la numera da telefon 118. Quei avon che spindrar persunas, serrar l’escha ed tenor situaziun cumbatter il fiug, secapescha senza semetter en prighel. Naturalmein che filmar e derasar novitads figurescha buc sin la gliesta dallas recumandaziuns per cumbatter incendis dalla Assicuranza da baghetgs dil Grischun.