Zernez es pront per l’Agrischa

Tuot es pront per üna bella fin d’eivna da festa a Zernez. Davo tschinch ons tuorna l’Agrischa, l’exposiziun agricula grischuna, darcheu in Engiadina. Dürant duos dis e suot il motto «divers ed autentic» preschaintan las ses societats da paurs da las valladas dal Süd ün vast program cun in tuot 30 stands da marchà, intuorn 50 expositurs da bes-chas, sur 30 expositurs d’interpraisas localas e d’utrò, e bler daplü.

Per quellas o quels chi sun forsa amo indecis segua quia üna cuorta survista dal plü important che chi capita e passa dürant ils duos dis a Zernez.

Che es l’Agrischa?

L’Agrischa es l’exposiziun annuala da l’agricultura grischuna chi vain organisada minch’on in ün’otra regiun geografica i’l chantun Grischun. Ella ha uossa lö in tuot fingià per la 15avla jada e per la terza jada a Zernez. Quist’exposiziun vala sco ün dals puncts culminants per tuot las pauras ed ils paurs grischuns e dess render lur lavur, lur prodots, lur tradiziuns e tuot quai chi tocca pro plü visibel e palpabel ad ün public plü vast.

Cura ed ingio ha lö l’Agrischa?

L’Agrischa ha lö sonda, ils 25 avrigl 2026 da las 9.00 fin a las 17.00 e dumengia, ils 26 avrigl 2026 da las 9.00 fin a las 16.00 a Zernez.

Che sun las attracziuns?

Dürant ils duos dis a Zernez daja da verer e tocker üna pruna. In sonda han lö tanter oter ün’exposiziun da vachas da lat, üna preschantaziun da razza da vachas mammas e muvel manü ed ün’invista i’l muond da l’allevamaint da chavals.

La dumengia sta lura suot l’insaina dad occurrenzas cun e per uffants. Quai cun ün cortegi festiv cun in tuot 15 fuormaziuns e societats, e lura differentas concurrenzas da bes-chas. Sco per exaimpel üna concurrenza da bescha, üna concurrenza da chavras ed üna concurrenza ingio ch’uffants preschaintan lur bes-chas predilettas.

Daja ün highlight?

Ün dals puncts culminants in sonda e per la prüma jada a l’Agrischa: Il «Offroad-Kjöring» da chavals. Ün sport simil al skijöring d’inviern, ma impè da skis s’esa da viadi cun inlineskates.

Ün oter punct culminant – e quel chi procura on per on per grond’attenziun – es dal sgüra la concurrenza da las bes-chas predilettas in dumengia. Dürant quella nu vegnan valütadas be las bes-chas sco talas, dimpersè eir la cumparsa dals uffants chi tillas preschaintan.

Da che das-chan ils uffants s’allegrar il plü fich?

Da duos dis plain impreschiuns cun bleras bes-chas per verer e tocker aint, ed implü d’üna concurrenza tuot speciala: L’olimpiada da famiglia, ün percuors ingio chi’d es dumandà indschegn, tecnica e perseveranza.

Ed ils creschüts?

Da la sonda saira a partir da las 18.00 illa tenda da festa cun trategnimaint da musica e da chant, sco per exaimpel culla società da musica da Cinuos-chel-Brail, la «Rümli Gang» e culla gruppa «Tiroler Trio Zunder».

Daja eir alch per guadagnar?

Sper ün e-bike chi’s po guadagnar cun partecipar vi d’üna tombola, as poja eir scumetter raps süll’agilità da chavras. Quai dürant l’occurrenza «Gitzi-Klettern» ingio chi vala da cleger oura la chavra la plü svelta rampignond üna tuor our da ballas da strom.