Nua che tuts han in handicap

Tgi entscheiva a dar golf ha per regla in handicap da 72 fridas. Per absolver ina runda sin ina plazza da golf da 18 ruosnas eis ei ina cefra indicativa. Pli paucas fridas ch’il giugadur drova da sittar ella ruosna la balla, e megliers ch’el ei. Siu svilup persunal sa el mesirar cul handicap che sereducescha cuntinuadamein cul progress. Aschia sa ei esser ch’el ha suenter in cert temps in handicap da 5 ni 4. Eis el aunc pli bass, per exempel 1,5, dat il giugadur – ni la giugadura – sco in profi.

30 participontas e participonts

Golfists ambizius emprovan naven dall’entschatta da sbassar lur handicap. Ils golfists ch’ein separticipai dumengia vargada silla plazza a Sagogn-Schluein al turnier, han dau quel tenor il reglament da Special Olympics Switzerland. Igl ei stau in turnier reservaus a persunas cun impediments – pia cun in handicap mental ni corporal. «Igl ei stau ina super atmosfera e per tuts eis ei stau in’experientscha positiva», conferma Urs Welti. Il commember dil club Buna Vista Sagogn ha organisau il turnier ensemen cun Aldo Doninelli da Special Olympics Switzerland. Malgrad ch’ei ha dau in cuort uradi il suentermiezgi, hagien tuts 30 participontas e participonts gudiu la concurrenza, ha Urs Welti declarau. El habitescha a Falera ed ei engaschaus dapi biars onns el sport da golf. Plirs onns ha el menau la partiziun dils juniors ed oz organisescha e meina el ensemen cun Regina Coray ils trenaments per persunas cun impediments.

«Igl ei nungetg bi da veser co els motivai e cun tgei plascher ch’els dattan», ha Urs Welti getg sin damonda dalla FMR. Dar golf ei in hobi che porscha bia a persunas cun impediments mentals e corporals. Els ein all’aria frestga, han moviment, ston esser disciplinai ed il giug culla balla sa esser ei ina sfida per la condiziun. Tut quels facturs ensemen para da motivar. Silla plazza da golf da Sagogn-Schluein trenescha ina gruppa regularmein. Mintga gievgia sera allas 17.30 emprenda la squadra da Special Golf Buna Vista da prender la posiziun correcta, da duvrar ils dretgs bastuns e da sittar culla precisiun e la dretga distanza.

Cun handicap 1.5

Dar golf seigi empau sco da dar schah, manegian golfistas e golfists meinsvart. Che la concentraziun ei essenziala, han las participontas ed ils participonts dil turnier Special Olympics sentiu. Ellas ed els han dau en treis livels. Dus livels han dau cun mintgamai el modus da teams da duas persunas. Mintga sportista e sportist cun impediment mental ni corporal ha dau cun ina sportista cun in handicap bass. Cul pli bass, numnadamein 1,5, ei Omar Halldorson dil club da golf Ennetsee separticipaus. Cun el Hilmir Omarson. Quella squadra ha gudignau il turnier da quei nivel 2 cun scars avantatg sils secunds Paul Rowe e Gabriel Perretta dil club indigen Special Golf Buna Vista Sagogn.

Gl’organisatur Urs Welti ei satisfatgs e trai ina bilanza positiva da quei turnier special. Separticipai ein equipas dall’entira Svizra. Culs indigens dil Grischun e da Glion ha glieud dil Tessin, da Losanna, dils cantuns Sviz e Zug giugau silla plazza verda da Sagogn-Schluein. Igl ei dil reminent ina plazza che pretenda aunc dapli inschign e concentraziun demai ch’ils liungs vials ein buca planivs mobein ondulai e per part ella plaunca. Ella categoria dils singuls che drovan negin sustegn e che dattan independentamein ein sis sportists vegni rangai. Els han dau persuls ina runda da 9 ruosnas. Gudignau en quella categoria ha Florian Camartin. Gl’indigen fa part dalla squadra da Special Golf Buna Vista. Secund ei Pablo Johnston dil Golf Club Losanna vegnius. Ferton che Florian Camartin ha in handicap da 18.5 puncts ei Pablo Johnston partius cun handicap 12.3.