Concert da duonnas cun pauer feminin

Il cor da duonnas «Las Inchantadas» ha concertà in venderdi e sonda passada illa baselgia San Geer a Scuol. Na dal tuot 77 duonnas d’eiran da la partida ed han preschantà cun lur dirigenta Nina Mayer 15 chanzuns cumpuonüdas impustüt da duonnas.

Davo la premiera da l’on passà han «Las Inchantadas» decis da tuornar cun ün program nouv chi’d es gnü preschantà in venderdi e sonda illa baselgia San Geer a Scuol. Nina Mayer nun ha be dirigi il cor, ella ha eir pisserà tanter las chanzuns per infuormaziuns davart lur program e muossà pauer feminin. Davo la prüma chanzun da Karen Kahan cul titel «Savage Daughter» cun chant per part unisono e cun sustegn da la pauca e cun batter ils peis per terra ha ella salüdà ad üna baselgia bain implida: «Nus eschan inchantadas da chantar insembel, inchantadas da chantar insomma ed inchantadas da das-chair salüdar a vus tuots a nos prüm concert da quist on.» Ella ha declerà cha’l tema dal concert saja «Duonnas» e ch’ellas chantan chanzuns scrittas da duonnas in differents stils ed epocas. «E nus savain cha be 10 % da las cumposiziuns classicas sun scrittas da duonnas.»

Il seguond toc ha cumanzà cun ün solo da Marina Buchli cul titel «Ave Generosa» da Hildegard von Bingen cun chant unisono e cun müdadas da las vuschs sopran ed alt vi e nan e cun üna finischun chantada solo. «Pata pata» da Miriam Makeba ha manà schlantsch e ritem in baselgia ed il chant es gnü sustgnü da Sidonia Caviezel al clavazin e dad Anna Mathis a la pauca.

Eir cumposiziuns da Nina Mayer

Il quart toc, «An eine junge Mutter», scrit da Nina Mayer cun ün text da Gabrielle S. Rüetschi, chi ha eir chantà cul cor. La chanzun es gnüda sustgnüda musicalmaing al clavazin. Sco prossem ha il public pudü tadlar üna chanzun da la cumponista Fanny Hensel cun ün text da Heinrich Heine. «Uossa chantaina alch pitschnin dad üna duonna fich cuntschainta, , da Clara Schumann, la duonna da Robert Schumann», ha declerà Nina Mayer. Üna chanzun cun ün solo da Lyne Good ed accumpagnada cun üna flöta a travers, e tanteraint han las duonnas tschüblà.

Bleras dumondas chi tscherchan respostas

E lura üna chanzun da Mi’Amia, «Magia feminina» cun pauer feminin dominà da prunas da dumondas, «Perche?» e «Schi co?» chi tscherchan respostas. Tuot ün oter cor da duonnas ha fat dudir la chanzun «Cinta di fior» da Maddalena Casulana cun bun ritem e schlantsch e cun trais vuschs da duonnas chi han muossà la potenza da las chantaduras e cun accords chi han fat bain a las uraglias. I s’ha eir gnü l’impreschiun cha las duonnas hajan chantà gugent quella chanzun ed han muossà quai eir cun lur corp chi d’eira pro bleras in movimaint.

Las preschaintas ed ils preschaints han eir dudi üna bella simbiosa culla chanzun da Nina Mayer e cun text dad Angelika Overath cul titel «La Raina». La 13avla chanzun «The Earth is a Women» da Dakota Butterfield ha muossà cun blerischmas repetiziuns dal titel d’ingionder cha’l vent sofla. «Las Stailinas» da Sidonia Caviezel, cun text da sia mamma Giana Caviezel, cun bella introducziun ed accumpognamaint dal clavazin ha muossà vers amunt in möd sensibel ed amicabel. L’ultima chanzun da «Las Inchantadas» es statta «Girl on Fire» dad Alicia Keys, eir fich ritmica, ha bod invidà a las duonnas i’l public da chantar. La chanzun ha gnü ün fich bel ultim accord chi ha pisserà per üna bella finischun da las producziuns dal cor da duonnas.

I d’eira üna bella masdada da chanzuns in bleras linguas, differents stils our da differentas epocas. Diversas chanzuns sun gnüdas accumpagnadas da Sidonia Caviezel al clavazin ed han dat ün bun fuond. Sco cha Nina Mayer ha dit nun es il cor intant amo üna società, dimpersè il cor «Las inchantadas». Las entradas da la collecta sun idas a favur da «Brava – Insembel cunter violenza da duonnas», Centrala da duonnas dal Grischun e Chasa da duonnas dal Grischun.