27 che vulan e negin che cala

Per las empremas elecziuns dil Cussegl grond tenor il sistem da proporz avon quater onns havevan 23 candidatas e candidats dil circuit da Glion aspirau. Uonn ein quei quater candidatas e candidats dapli. E sco gia 2022 setracta ei d’ina buna mischeida da candidatas e candidats pli enconuschents sin palancau dil circuit e d’in triep candidaturas da persunas novizas e meins enconuschentas neu da lur engaschi public d’entochen dacheu.

Il Center e la PPS vulan
silmeins il status quo

Ch’il Center cun las candidatas ed ils candidats dall’anteriura PCD tschentan adina biaras candidaturas el circuit da Glion ei ina realitad historica. 2022 han els presentau sis candidatas e candidats e treis ein vegni elegi. La surpresa dalla davosa gada ei stau l’elecziun da Martina Beeli da Sagogn che ha gudignau la lutga electorala pil sez da Carmelia Maissen ch’ei vegnida eligida avon quater onns ella Regenza. Era la Partida populara svizra ha cun Renatus Casutt da Falera reacquistau il sez ch’ella haveva stuiu surschar a sias uras al liberaldemocratic Lorenz Alig da Pigniu. Cun sis candidatas e candidats vul la PPS defender igl agen sez ed acquistar in ulteriur mandat el Cussegl grond.

PS e La Verda
cun dapli candidaturas

A basa dalla survesta dallas candidaturas el circuit da Glion san ins constatar che las partidas burgheisas domineschan. Da l’autra vart ein las candidaturas dils socialdemocrats e da La Verda s’augmentadas. Cun sis candidatas e candidats el circuit da Glion va la Partida socialdemocratica ellas elecziuns dil Cussegl grond uonn ils 14 da zercladur. Avon quater onns havevan quater candidatas e candidats priu part. La midada principala da lezzas uras ei stau l’elecziun da Silvio Dietrich ch’ei suandaus a Roman Cantieni ch’era buca vegnius reeligius. Per la partida La Verda candideschan uonn duas dunnas e dus umens pil parlament cantunal. Cun ina candidatura (tuttina sco 2022) separticipescha era la Partida verd-liberala dallas elecziuns el circuit da Glion.

Ils veders recandideschan

Las sis deputadas e deputai dil circuit da Glion el Cussegl grond recandideschan tuttas e tuts per in’ulteriura perioda d’uffeci. Igl ei difficil da far ina prognosa, cunquei ch’il sistem d’eleger tenor il sistem da proporz ei aunc giuvens era ella Foppa. Cert ei denton ch’ils verds ed ils verd-liberals han entochen dacheu giu in grev stan el circuit da Glion.

Candidaturas dil circuit da Glion

Gliesta 1 Partida liberaldemocratica (PLD)

Gian Marco Bianchi, 1983, ­meinafatschenta, commember parlament communal, Glion

Hanspeter Bundi, 1968, menader da sectur, Castrisch

Ivo Frei, 1970, menader da ­vendita, Glion

Ivo Capaul, 1997, perscrutader politica da segirtad SPF, Rueun

Gliesta 2 Partida verd-liberala (PVL)

Francesco Müller, 1980, menader da cumpra, Glion

Gliesta 3 Il Center

Martina Beeli, 1965, pura e deputada, Sagogn

Kevin Brunold, 1985, econom da menaschi, directur da turissem e deputau, Surcuolm

Daniel Candinas, 1987, tecnicher HF, pur e commember ­parlament communal, Rueun

Ernst Sax,1974, advocat, president communal e deputau, ­Sursaissa

Claudio Quinter, 1969, expert d’immobilias e commember dil parlament communal, Glion

Ursina Jecklin Candrian,1979, menadra dil Museum ­regiunal Surselva

Gliesta 4 Partida populara svizra (PPS)

Serafin Caminada, 1988, pur, Lumbrein

Gieri Flurin Darms, 2004, ­emprendist da banca, Glion

Corina Hunger, 1963, emploiada mercantila, Vuorz

Marcel Meier, 1992, menader d’implonts, Castrisch,

Renatus Casutt, 1951, impressari construcziun da lenn, Falera

Franz Albin, 1966, guardia da cunfins, Sogn Martin

Gliesta 5 La Verda

Anian Camathias, 2002, student da politologia e historia, Sagogn

Celine Hulliger, 2005, studenta energias regenerablas e tecnica d’ambient, Glion

Severin Studt, 1984, emploiau mercantil, Rueun

Caroline Huber, 1970, tecnologa da bio, Laax

Gliesta 6 Partida socialdemocratica (PS)

Samuel Bislin, 1993, menader da project inschignier d’ambient SPF, Sagogn

Silvio Dietrich,1967, manager da formaziun, Glion

Michal Hohl, 1985, scolasta, ­suprastonta communala, Glion

Nina Pfaff, 1985, substituta meinafatschenta, cussegliera da scola, Castrisch

Uolf Candrian, 1992, Museum regiunal Surselva, Lia Rumantscha, Glion

Daniel Schneider, 1991, ­Architect SPF /SIA, Luven