Cuorer per tut quellas e quels che san buca

Ils iniziants dalla cuorsa da solidaritad al quart Städtlilauf a Glion che ha liug ils 9 da matg 2026 cuoran per las pazientas ed ils pazients che piteschan dalla mialgica encefalomyelitis/sindrom da fatigue cronic (ME/CFS) e per quellas e quels da long-Covid che san era buca pli far sport. «Nus vulein dar in signal e render attents il publicum dil Städtlilauf a quella part dalla populaziun che separticipass bugen, mo che sa buca pli», di l’ergoterapeuta Ramona Cathomas da Glion che ha iniziau l’acziun. Las pazientas ed ils pazients da ME/CFS e Long Covid stoppien renunziar a fetg bia e stoppien s’organisar per tut quei ch’els veglien interprender.

Ver 60 participontas e participonts

«Per biars carstgauns ei la cuorsa annuala tras il marcau da Glion in eveniment sportiv ch’els vulessen buca desister. Per auters eis ei gnanca pusseivel d’esser leu sco aspectatur», di Ramona Cathomas, che prenda era part sco curridra al Städtli­lauf d’uonn. Ella meina la practica Ergoterapia plus a Glion e tracta biebein 20 pazientas e pazients dalla Surselva cun malsognas cronicas sco ME/CFS e long-Covid. L’idea per l’acziun da cuorer per tuttas e tuts che san buca cuorer ha Ramona Cathomas giu ed ella ha sur­vegniu immediat il sustegn da pliras varts, denter auter era dalla dall’Associaziun ME/CFS dalla Svizra. Perquei ha ella entschiet a rimnar participontas e participonts pil Städtlilauf. «Mia finamira ei stau da vegnir ensemen cun 50 ed ussa essan nus gia datier da 60 curridras e curriders», di Ramona Cathomas.

In camischut sco emblem

«Quellas e quels che piteschan da ME/CFS e da long-Covid ein buca quellas e quels che van en stizun a far cumissiuns», di Ramona Cathomas. «Savens ves’ins buca che pazientas e pazients sco ils mes ein malsauns. Cheutras vegn ei magari reproschau ad els ch’els veglien buc esser presents. A quellas stigmatisaziuns vulein nus dar ina cunterpeisa», declara l’ergoterapeuta da Glion. Las curridras ed ils curriders dall’acziun da solidaritad vegn ins ad enconuscher vid lur emblem, in camischut ch’ei inscrets cun il motto dalla acziun. Tgi ch’ei buc alla partenza sco curridra e currider dall’acziun, sa era prender part sco aspectatura ni aspectatur agl ur dalla via cun sustener quellas e quels che cuoran cun in ni plirs balluns ch’ins sa retrer avon il Städtlilauf.