Uss vegn fatg guotas cun tgau

Igl onn vargau han las vischnauncas da Breil, Mustér, Medel, Sumvitg, Trun e Tujetsch decidiu da fundar la Corporaziun dallas vischnauncas concessiunarias dall’Ovra Electrica Rein Anteriur SA. Entochen la fin digl onn vargau han ils organs politics da tuttas sis vischnauncas acceptau la corporaziun ed ils statuts da quella. Consequentamein sa la corporaziun seradunar a si’emprema radunonza da delegai. Quella ha liug gievgia, ils 30 da schaner 2025 a Trun. A quella radunonza vegn eligiu la suprastonza, la cumissiun da gestiun e tractau il preventiv, il reglament da salarisaziun e quel dalla representanza dallas vischnauncas el cussegl d’administraziun dall’Ovra Electrica Rein Anteriur SA (ORA). La fin finala vegn era il representant el cussegl d’administraziun dall’ORA eligius, sco era in suppleant ella cumissiun da finanzas da quella.

Patrick Schaniel sco president

La conferenza dils presidents communals dalla Cadi propona Patrick Schaniel da Sumvitg e Martin Cavegn da Tujetsch sco commembers dalla suprastonza dalla corporaziun. Patrick Schaniel ei nominaus sco president, damai ch’el ha prestau la lavur da preparaziun dalla corporaziun ed ei aschia cudischius culs detagls. Ella suprastonza che sa secumponer tenor ils statuts da treis entochen tschun commembers, duein duas ulteriuras persunas vegnir tscharnidas. «Nus lein buc occupar la suprastonza sulettamein cun persunas ufficialas dallas vischnauncas. La finamira ei d’haver ella suprastonza era persunas cun savida specifica», di Patrick Schaniel. Da tgi ch’ei setracta ha el buca vuliu tradir, mo las duas persunas ein anfladas. Alla radunonza separticipescha mintgina dallas sis vischnauncas cun in delegau. Quel representa mintgamai la cumpart vid la corporaziun da mintga vischnaunca tenor la clav fixada els statuts.

Nez dall’aua el center

Igl intent primar dalla corporaziun ei da sepreparar ad uras sil nez futur dall’aua sisum la Surselva. «2048 scadan ils contracts da concessiun dallas vischnauncas cull’ORA. Entochen 2033 sto ella communicar sch’ella vul prolunghir la concessiun ni buc ed entochen 2038 sto mintga vischnaunca decider davart ils contracts ni il retuorn a tschep. En otg onns san las vischnauncas pia tgei che l’ORA preveda e sin quei mument lein nus esser preparai bein», di Patrick Schaniel. Per quei motiv vegli la corporaziun recaltgar savida ils onns vegnents. «En quei connex essan nus dependents da persunas dil fatg. Las preparativas per contrahar succedan entras la suprastonza, eventualmein era cun cussegliaders ni a basa d’in mandat per exempel ad in biro specialisau», di Patrick Schaniel.

Vendita dall’energia

Il mument stat denton aunc l’incumbensa dall’economisaziun dall’energia da concessiun e participaziun dallas sis vischnauncas sisum la gliesta dallas prioritads. «En quei connex ha ei num definir la strategia pertuccont la vendita d’energia», declara Patrick Schaniel. Actualmein succeda l’economisaziun dall’energia da participaziun e da concessiun dallas vischnauncas entras il biro d’inschignier da Walter Deplazes da Surrein en collaboraziun cun Ciril Deplazes, meinafatschenta dall’Energia Alpina a Sedrun. Ils prezis per l’energia electrica ein svariai fetg ils davos onns, aschia ch’ina survesta e cumpetenza sin quei sectur ei d’eminenta impurtonza per las vischnauncas. Medemamein eis ei necessari da sefatschentar dalla cunvegnientscha davart la valur restonta dall’ORA. En quei connex setracta ei da sededicar d’eventualas investiziuns dall’ORA. «Quei ein investiziuns che san eventualmein buca vegnir amortisadas entochen che la concessiun scada. Per quei motiv eis ei necessari da definir ils detagls dalla valur respectivamein dallas investiziuns», di Patrick Schaniel.