An en onn bler ainten l’aria
La Air Zermatt è en travagl tgi dat gio siva digl 1968. Tg’en Surmiran lavoura tar chel menaschi è bagn pitost extraordinari. Igl è chegl Marco Gianiel, tratg se ed uriund da Tinizong.
Gio igl nom Air Zermatt tradescha tgi chel travagl è en menaschi staziuno aint igl Valleis. Siva da 57 onns dattigl gio chella organisaziun, tg’è da gronda muntada cunzont perveia digl sarvetsch da salvamaint betg angal aint igl Valleis. Igl domber da salvamaint cun helicopters schea per onn tar passa 2 000 acziuns. Vetiers vignan alloura anc las acziuns da salvamaint antras l’ambulanza tgi schean annual tar en domber da radond 1 200. Naturalmaintg segna la Air Zermatt er per transports da tot gener, montaschas, registraziuns da films e per sgols da persungas. Agl travagl stattan a disposiziun 11 helicopters, tot maschinas equipadas cun tot chegl tgi dovra per en sarvetsch da salvamaint serious e fido.
Egn da 75 ampluias
La Air Zermatt è aint igl Valleis betg angal da gronda impurtanza pigl sarvetsch da salvamaint, mabagn è ella er en grond patrung. L’organisaziun occupescha 75 persungas tar las treis basas a Gampel, Raron e Zermatt scu er agl eroport da Sion. Egna da chellas è Marco Gianiel tg’è tratg se an Surses, detg pi concret a Tinizong. Tar la Air Zermatt lavoura el siva da dus onns scu sanitari da salvamaint, ena professiun cun ena pulita responsabladad. Igl team da chel travagl cumpeglia sa tgapescha dasper igls sanitaris da salvamaint er pilots, gidanters da sgol, tecnicists e persungas tgi segnan per la furmaziun e per l’administraziun. Tar en sgol da salvamaint cugl helicopter èn dalla parteida treis persungas, igl pilot, en medi d’urgenza ed en sanitari da salvamaint. Mantger mantgan er betg differents medicamaints cunter dolours, pigl cor ed er per far narcosas.
Fatg igl amprendissadi a Samedan
Marco Gianiel è dall’annda 1981 e bab dad ena feglia da 18 onns. El stat ainten en li dasper Visp. Igl amprendissadi da sanitari da salvamaint ò el fatg scu sagond amprendissadi. «Fatg vaia igl amprem en amprendissadi da mecanist agricol tar Pol Savoldelli, barmeir», dei Marco Gianiel. Detg ò el er tgi Pol Savoldelli seia sto en bung patrung. Siva digl amprendissadi da mecanist agricol ò igl om da Tinizong luvro igl anviern tschintg onns scu patruglier tar Savognin Pendicularas SA. Siva da chels tschintg onns è Marco Gianiel davanto successour da Peder Guetg tg’è sto blers onns manader dalla gruppa digls patruglier da Savognin Pendicularas SA. «Tschintg onns sunga sto chef digl team digls patrugliers dallas pendicularas da Savognin», ò detg Marco Gianiel.
«Ia ma cat bagn aint igl Valleis»
Sa decidia è Marco Gianiel alloura cun passa 30 onns da far en amprendissadi scu sanitari da salvamaint. Fatg chel amprendissadi da treis onns ò el cun success a Samedan tar l’Ambulanza Nagiadegna ota. Sessour ò igl Surmiran luvro quatter onns tar l’Ambulanza Coira. Da lò è el sto per en taimp a Balzers aint igl Principadi da Liechtenstein. Tar la secziun Piz Platta digl Club Alpin Svizzer è Marco Gianiel sto ples onns en manader ed instructour premuro dallas gruppas da salvamaint localas (First Responder). Dallas capacitads ed abilitads da Marco Gianiel scu sanitari da salvamaint saveva er igl chef dalla Air Zermatt. El è alloura er chel tg’ò offeria agl om da Tinizong la plazza scu sanitari da salvamaint tar la Air Zermatt. Marco Gianiel dei: «Ia ma cat bagn aint igl Valleis». Sa tgapescha tg’el è pertschert dalla responsabladad dalla sia professiun ed er digl taimp da lavour irregular cun en sarvetsch da basa, vot deir noua tg’ins ò dad esser disponibel 24 u er 48 ouras. An mintga cass, cura tgi Marco Gianiel discorra dalla sia lavour ins s’accorscha tg’el fò chella lavour cun passiun, angaschamaint e l’experientscha basignevla.
Gust da leger dapli?