«Intermediar cultura ei ina biala lavur»

«Igl ei nuota sempel da trer ina bilanza damai ch’igl ei stau l’emprema exposiziun che jeu hai realisau. Igl ei segir stau in’aventura, mo jeu sun fetg cuntents», di Marco Coray che ha surpriu il tgamun operativ dalla Casa d’Angel igl onn 2024 da Anne-Louise Joël. Ella haveva era aunc tratg ils emprems fils per l’exposiziun «fusiognomias» ch’ei stada ina contribuziun alla fiasta centenara dalla Ligia Grischa. Marco Coray di ch’el hagi ussa saviu experimentar ils singuls pass da lavur naven dall’ entschatta entochen alla fin d’ina exposiziun.  «Il cuntegn dall’exposiziun ei staus fetg pretensius. Ina fetg nova e differenta experientscha ei perquei stada l’inter­mediaziun. Pia dil dar vinavon ils cuntegns dall’exposiziun allas visitadras ed als visitaders da tuttas vegliadetgnas.»

In publicum different

«L’exposiziun ei vegnida visitada d’in vast publicum», di Marco Coray. «Quei publicum ha fetg differents interess e spetga savens caussas cuntrarias da mei e dad in’exposiziun.» El hagi fatg guidas per affons e per carschi, per persunas pli giuvnas e pli veglias, tuts cun differentas enconuschientschas preliminaras dil tema. Marco Coray raquenta cun entusiassem da sias experientschas e da siu plascher da cuntinuar. «Igl ei stau ina bellezia experientscha da declarar l’exposiziun e da veser co la glieud bandunava fetg satisfatga la Casa d’Angel.» El hagi era saviu rimnar experientschas co metter il focus dall’informaziun aschia che quel seigi adequats allas visitadras ed als visitaders. 

Midadas ein in process

Marco Coray ha menau alla fin la davosa sonda sera l’otgavla exposiziun ch’ei ha dau en Casa d’Angel a Lumbrein dapi ch’ella ei vegnida aviarta. Midadas bufatgas che corrispundien a siu stil persunal hagi el fatg sco menader da gestiun, ha Marco Coray tradiu. « Jeu haiel supriu in grond carnet da pensums da mia anticessura. Lu hai jeu duvrau in emprem temps da seluvrar en e sedocumentar els pensums fetg vasts dil meinagestiun. Jeu haiel ussa l’incumbensa da trer vinavon la via encaminada dalla fundaziun da cultura. Midadas hai jeu fatg plitost en process administrativs, aschia ch’els constatan per mei,» di Marco Coray. Ina midada seigi  per exempel stau da scursanir las exposiziuns grondas da nov sin sis meins. Persuenter fetschi la Casa d’Angel in’exposiziun pli pintga da treis meins naven dil fevrer tochen il matg e lu naven dalla stad puspei in’exposiziun pli gronda. Plinavon detti ei midadas administrativas che seigien buca veseivlas pil publicum.

Animar la discussiun

L’emprema exposiziun da Marco Coray en Casa d’Angel ei vegnida curatada da Damian Christinger, in curatur ch’instradescha exposiziuns sigl entir mund e ch’ei era gia sepresentaus ella Cularta a Laax ni ella Casa melna a Flem. Marco Coray: En Casa d’Angel vulein nus era egl avegnir luvrar ensemen cun curaturs ed artists da num ton sco cun artistas ed aritsts pli pauc enconuschents e muentar la discussiun. Nus vulein reflectar la cultura locala e purtar quella anoviars sur ils cunfins da nossa regiun e metter quella en in context. Mia finamira eisi era da mantener ina buna ballontscha denter plidentar la populaziun indigena e svegliar igl interess d’in publicum internaziunal per nossa lavur en Casa d’Angel.

Naven digl 1. da fevrer 2025 presenta la Casa d’Angel ina exposiziun da fotografias artisticas da Johann Clopath da Trin. El expona fotografias dalla natira che tematiseschan insects, aua, brentina e glatsch.