S-chanf: Bazar in l’hotel Scaletta

A S-chanf spettaiva da tuotta sort glieud cun tas-chas e perfin valischs davaunt l’Hotel Scaletta. E que già üna mezz’ura aunz cha’l bazar cun l’inventar vegl da l’hotel abanduno ho cumanzo in sanda passeda. Cul sun dal sain dal clucher s’haun las portas da l’hotel aviertas. La glieud es entreda e s’ho missa a svutrer illa roba chi d’eira raseda oura sün maisas illas localiteds da l’hotel. Que daiva plats, padellas, poseda ed üna pruna otra vaschella in tuot las fuormas e grandezzas. Sper roba da chadafö daiva que eir pitschna mobiglia da lain. Tuot que stuvaiva svanir. Singula roba – scu per exaimpel las bellas s-chantschias da lain – d’eira markeda cun ün grand punct blov. Quella nu’s sus-chaiva piglier.

Passanto bger temp in l’hotel

Traunter ils visitaduors e las visitaduras es sto eir Schimun Caratsch. Tenor el raquintan ils ogets istorgias da temps passos, inua cha’ls magöls da vin gnivan auncha druvos per fer viva e las maisas nu d’eiran auncha plain puolvra. Schimun Caratsch ho passanto bger temp da sia infanzia in l’hotel chi tuchaiva pü bod a sia nona. L’ultim possessur – aunz cha l’hotel ho serro – es però sto ün Ollandais, uscheja cha bgeras algordanzas da sia nona nu sun restedas. Tuottüna fo que ün po mel al cour a guarder cu cha la chesa as svöda, ho Schimun Caratsch dit: «Ad es d’üna vart ün po trist, da l’otra vart pudains dir cha que vo inavaunt cun la chesa Scaletta.»

Ün cudesch da contabilited dal prüm possessur

Ün oter visitadur dal bazar es sto Ernst Parli. Eir el d’eira a la tschercha da roba custaivla. El lavuraiva pü bod tar la vschinauncha, uossa s’occupa’l gugent cun l’istorgia da la vschinauncha da S-chanf. Sia tschercha in l’hotel ho purto früt: Sün crapenda ho’l chatto ün cudesch vegl da contabilited. Quel es gnieu scrit dal prüm possessur da l’hotel, Lucas Wehrli. In quist cudesch sun notos divers quints da vin e da chambras, ma eir las investiziuns dal prüm hotelier dal Scaletta. Üna da quellas investiziuns d’eira il talvo dasper l’hotel. Ernst Parli pensaiva cha quist talvo gniva druvo scu transit per chavals e vittürins da la posta. Illa contabilited esa però eir noto cha’l talvo gniva druvo per l’egen bain puril. Pü tard – düraunt la prüma guerra mundiela – d’eiran staziunos cò ufficiels. Illa sela granda d’eira perfin drizzo aint ün lazaret düraunt la grippa spagnöla. Zieva las guerras mundielas sun darcho gnieus ils giasts da la Svizra e dals pajais cunfinants.

27 chambras, ot abitaziuns ed ün’ustaria

Pel mumaint nu vegnan ne il talvo ne l’hotel druvos. A do però plans per müder que: a dess der da nouv 27 chambras, och abitaziuns ed ün’ustaria – gestiunedas da la Reka – per ün totel da s-chars 14 milliuns francs. Actuelmaing mauncha auncha circa ün mez milliun francs. Tuottüna as voul que cumanzer la prümavaira cun las lavuors da construcziun, ho dit Mengia Mathis chi’d es commembra dal cussagl da la fundaziun per l’Hotel Scaletta. «Ad es ura e temp cha’s cumainza, uschigliö perdainsa il schlauntsch.» Ün prüm pass es uossa almain fat cun vender la roba dal vegl manaschi.