Loipas carmalan cun premis

Igl intschess da Surselva Turissem cumpeglia diesch loghens cun loipas: Flond/Valata, Plaun Rueun e Migliè a Breil, Degen e Vella, Castrisch, Siat, Ladir, Trun/Sumvitg/Surrein e Thalkirch en Stussavgia. Flond, Trun e Degen porschan era loipas da notg ed a Flond procura neiv artificiala per la garanzia da neiv. Tut en tut mesiran quellas loipas rodund 50 kilometers. La pli cuorta loipa sesanfla a Siat e ha ina lunghezia da 900 meters, la pli liunga ei quella da Flond cun 7,4 kilometers. «Cun quei s’auda la Surselva buca tier las pli grondas regiuns da cuorsa liunga, persuenter tier las pli variontas el cantun Grischun», di Karsten Friedrich, menader marketing da Surselva Turissem.

Biala purschida

Quella biala purschida da cuorsa liunga nezegia Surselva Turissem per ina challenge respectivamein ina concurrenza. «En quella quenta buca la prestaziun, mobein quella da visitar aschi biars territoris da cuorsa liunga dalla regiun e da rimnar puncts en quei connex. Cun quella challenge lessan nus mussar als hosps, indigens e possessurs da secundas habitaziuns con biala che la purschida dil sport da cuorsa liunga ei en Surselva», vegn Karsten Friedrich citaus en ina communicaziun als mieds da massa. La pretensiun: Las participontas ed ils participonts han d’absolver silmeins 3 kilometers duront minimum 15 minutas sin ina loipa. Lu dat ei gia ils emprems puncts.

In cuors ni ina capetscha

Tgi ch’ademplescha quellas cundiziuns en silmeins treis loghens separticipescha alla concurrenza cun premis. Participontas e participonts che visetan dapli loghens augmentan lur schanza per premis da bonus. Da gudignar dat ei cuors da cuorsa liunga entochen servis da skis ni capetschas. Sco Surselva Turissem scriva, ei la participaziun gratuita e succeda cull’annunzia cun telefonin cun in code QR che sesanfla alla partenza da mintga loipa. En quei connex eis ei necessari da disponer dall’app dad Outdooractive.